نوۆوسىبىردىڭ بۇرىنعى ۆيتسە-گۋبەرناتورى ءاليحان بوكەيحانوۆ تۋرالى كىتاپ جازدى - فوتو
ءاليحان بوكەيحانوۆ تۋرالى كىتاپ جازۋدى 2019 -جىلى باستادىم. بيىل تۋىندىنى اياقتاپ جۋىردا نوۆوسىبىردە تانىستىرىلىمى ءوتتى. اتاۋىنا قاتىستى ۇزاق ويلاندىم.
سەبەبى ءاليحان تاريحي تۇلعا، سوندىقتان وعان قاتىستى ەڭبەكتىڭ اتاۋى اسا ماڭىزدى. جالپى بۇل كىتاپ رەسەي جۇرتشىلىعى مەن ونىڭ عىلىمي قاۋىمىنا ارنالىپ جازىلدى. قازاقستان كورشى، دوس ەل بولعانىمەن وعان قاتىستى كوپشىلىك بىلە بەرمەيتىن تاريحي وقيعالار كوپ. مىسالى، كونە ريم، گرەكيا نەمەسە انگليا تۋرالى تاريحتان جاقسى بىلەمىز، ال كورشى وتىرىپ قازاقستانعا قاتىستى كەيبىر جايتتاردان حابارىمىز بولماي جاتادى. وسى ورايدا اتالعان تۋىندى قازاق حالقىنا جاساعان سىيىم دەسە دە بولادى»، - دەدى ۆيكتور كوزودوي كىتاپتىڭ تۇساۋكەسەر راسىمىندە.
اۆتور ءاليحان بوكەيحانوۆ تۋرالى كىتاپ جازۋدا قازاقستان مەن رەسەيدىڭ 10 قالاسىنىڭ 12 ارحيۆىمەن جۇمىس ىستەپتى.
«مەن بۇعان دەيىن ءسىبىر تاريحىن زەرتتەگەم. ونىڭ ىشىندە ازامات سوعىسى مەن توڭكەرىس كەزىندەگى ءسىبىردى. سوندا بايقاعانىم، 1920 -جىلى قازاق- قىرعىز اۆتونومياسى قۇرىلعان. وسى تۇستا مەندە قيىن- قىستاۋ زاماندا قازاقتارعا ءوز الدىنا اۆتونوميالى ەل بولۋ قالاي بۇيىردى دەگەن سۇراق تۋىندادى. ارينە، بۇل جەردە ءاليحان بوكەيحانوۆتىڭ ءرولى زور. ايتپەسە، سول كەزدە رەسەي يمپەرياسىنىڭ قۇرامىندا جۇزدەگەن حالىق ءومىر ءسۇردى. سولاردىڭ ىشىندە قازاقستان عانا اۆتونوميالى ەل بولا الدى»، - دەيدى ول.
ونىڭ ايتۋىنشا، جاڭا تۋىندىدا ءاليحان بوكەيحانوۆتىڭ ءومىرى مەن ساياسي قىزمەتىنە قاتىستى تىڭ ارحيۆتىك دەرەكتەر جاريالانىپ وتىر. ودان بولەك، تاريحشى جەرلەسىمىز تۋرالى كىتاپ جازۋىنا رەسەيدە ءاليحان بوكەيحانوۆ تۋرالى ەڭبەكتىڭ جوقتىعى سەبەپ بولعانىن ايتتى. ەلورداداعى ل. گۋميليەۆ اتىنداعى ەۋرازيا ۇلتتىق ۋنيۆەرسيتەتىندە وتكەن ايتۋلى شاراعا تاريحشىلار، زيالى قاۋىم وكىلدەرى جانە ستۋدەنتتەر قاتىستى.
اۆتور: ءالي يبرايەۆ
