ەرالى توعجانوۆ قۇرىلاتىن جاڭا جۇمىس ورىندارى تۋرالى ايتتى
«ۇكىمەت ەڭبەك ادامىنىڭ بەدەلىن ارتتىرىپ، تابىسىن كوتەرۋگە باعىتتالعان كەشەندى ناقتى جۇمىستاردى ىسكە اسىرىپ جاتىر. بىرىنشىدەن، الەۋمەتتىك ساياساتتا قاراپايىم ەڭبەك ادامىنىڭ تابىسىن ارتتىرۋعا باسىمدىق بەرىلىپ وتىر. اتاپ ايتقاندا، بيىل ەڭبەكاقى تەڭسىزدىگىن بولدىرماۋعا باعىتتالعان جۇمىستار اياسىندا ەلىمىزدە 900 گە جۋىق كاسىپورىندا 600 مىڭنان استام جۇمىسكەردىڭ جالاقىسى ورتا ەسەپپەن 25 پايىزعا ارتتى. ازاماتتىق قىزمەتشىلەر جالاقىسى ورتا ەسەپپەن 19 دان 45 پايىزعا دەيىن كوتەرىلدى. بۇدان بولەك، مەملەكەت باسشىسىنىڭ شەشىمىمەن كەلەسى جىلدان باستاپ ەڭ تومەنگى جالاقى مولشەرى ارتاتىن بولادى. ناتيجەسىندە، 1,7 ميلليون جۇمىسكەردىڭ تابىسى وسەدى»، - دەدى ە. توعجانوۆ.
ونىڭ ايتۋىنشا، جاڭا جۇمىس ورىندارىن اشۋ باعىتىندا جۇيەلى شارالار قابىلدانىپ جاتىر. ناتيجەسىندە، جىل باسىنان بەرى 1 ميلليوننان استام ادام جۇمىسپەن قامتۋ ءىس-شارالارىنا تارتىلىپ وتىر.
«جۇمىسسىزدىقتىڭ دەڭگەيىن اينالامىزداعى جاعدايعا، پاندەمياعا قاراماستان، 4,9 پايىز دەڭگەيىندە ساقتاپ قالۋعا مۇمكىن بولدى. ناقتى قابىلدانعان شارالاردىڭ ارقاسىندا وسى دەڭگەيدە قالىپتاستى. سونىمەن قاتار، 12- قازاندا ۇكىمەت وتىرىسىندا بەكىتىلگەن ۇلتتىق جوبالار اياسىندا 2025-جىلعا دەيىن 1,7 ميلليون جاڭا جۇمىس ورىندارىن قۇرۋ جوسپارلانىپ وتىر»، - دەدى ۇكىمەت باسشىسىنىڭ ورىنباسارى.
بۇدان بۇرىن حابارلانعانداي، ەلوردادا «جالپىعا ورتاق ەڭبەك قوعامىنا» اتتى رەسپۋبليكالىق فورۋم ءوتتى. تاۋەلسىزدىكتىڭ 30 جىلدىعىنا ارنالعان ءىس-شارا بارىسىندا ەڭبەك ارداگەرلەرى مەن «ەڭبەك جولى» رەسپۋبليكالىق كونكۋرسىنىڭ جەڭىمپازدارىن سالتاناتتى ماراپاتتاۋ ءراسىمى ءوتتى.
