ماس كۇيىندە كومباين جۇرگىزىپ، ءىستى بولدى - پاۆلودار وبلىسى
پاۆلودار وبلىستىق پوليتسيا دەپارتامەنتىنىڭ باسپا ءسوز قىزمەتىنىڭ حابارلاۋىنشا، ۋسپەن اۋدانىنىڭ پوليتسيا ءبولىمىنىڭ قىزمەتكەرلەرى جول- كولىك وقيعالارىنىڭ الدىن الۋ ماقساتىندا ارنايى تەكسەرىس جۇمىستارىن جۇرگىزگەن. رەيد بارىسىندا پوليتسەيلەر جۇرگىزۋشىلەرگە جول- كولىك وقيعاسىنىڭ نەگىزگى سەبەپتەرىن اتاپ ءوتىپ، ولارعا وقيعالاردىڭ الدىن الۋ ءۇشىن قاۋىپسىزدىك شارالارىن تۇسىندىرۋدە.
- كەزەكتى رەيدتىك ءىس- شارا بارىسىندا بەلوۋسوۆكا اۋىلىنىڭ ماڭىندا ءتارتىپ ساقشىلارى جۇرگىزۋشىسى ورتاشا دارەجەدە ماس كۇيىندە بولعان كومبايندى توقتاتتى. ەر ادام تۇسكى ءۇزىلىس كەزىندە ىشىمدىك ىشكەن، سودان كەيىن دالاداعى جۇمىسىن جالعاستىرعان. جۇرگىزۋشىگە قاتىستى ق ر ا ق ب ك 608-بابىنىڭ 1-بولىگى بويىنشا اكىمشىلىك حاتتاما تولتىرىلىپ، 15 تاۋلىككە اكىمشىلىك قاماۋعا الىندى، - دەدى جەرگىلىكتى پوليتسيا باستىعى قۋاندىق شاحمانوۆ.
ايتا كەتەلىك، اعىمداعى جىلى ۋسپەن اۋدانىنىڭ اۋماعىندا پوليتسيا قىزمەتكەرلەرى ماس كۇيىندە كولىك تىزگىندەگەن 20 جۇرگىزۋشىنى انىقتاعان.
