داۋرەن ابايەۆ: ءتىلىمىزدى دامىتۋعا بوس سوزبەن ەمەس، ناقتى ىسپەن ۇلەس قوسۋ كەرەك
مۇنداي پىكىردى «سوزتۇزەر» سوزدىگىنىڭ تۇساۋكەسەرىنە وراي ءسوز ارناعان ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ Facebook تە ءبىلدىردى، دەپ حابارلايدى قازاقپارات ءتىلشىسى.
«ارداقتى اعايىن! بۇگىن ءبىز مىنا «سوزتۇزەر» اتتى قاتە قولدانىستار سوزدىگىنىڭ تۇساۋكەسەرىن وتكىزدىك. بۇل - بۇقارالىق اقپارات قۇرالدارىنداعى مەملەكەتتىك ءتىلدىڭ قولدانىسىن رەتتەۋگە جانە انا ءتىلدىڭ تازالىعىن ساقتاۋعا ارنالعان جوبا. سوڭعى كەزدە قازاقشا باسپا ءسوز بەن تەلە-راديو ارنالار تىلىندە ءارتۇرلى قاتەلەردىڭ بەلەڭ العانى تۋرالى ءجيى ايتىلىپ ءجۇر. ۋاقىت وتكەن سايىن مۇنداي قاتەلەر كۇندەلىكتى قولدانىسقا ەنىپ كەتۋى مۇمكىن. ودان انا ءتىلىمىزدىڭ تابيعاتى بۇزىلىپ، ساۋاتتىلىق دەڭگەيىنىڭ تومەندەۋى ىقتيمال. سوندىقتان ءبىز وسى ماسەلەنى شەشۋ ءۇشىن بەدەلدى عالىمدار مەن ءتىل ماماندارىن جيناپ، وسى سوزدىكتى جاساپ شىعاردىق»، - دەدى داۋرەن ابايەۆ سوزدىكتىڭ تۇساۋكەسەرىنە وراي حالىققا ارناعان ۆيدەو ۇندەۋىندە.
ونىڭ اتاپ وتۋىنشە، سوزدىكتە ءجيى كەزدەسەتىن ەكى مىڭنان استام قاتە قولدانىس جيناقتالعان. ولار جان-جاقتى ءتۇسىندىرىلىپ، دۇرىس نۇسقاسى كورسەتىلگەن. نەگىزىنەن ستيلدىك جانە ەملەلىك قاتەلەر، كالكا اتاۋلار، جاساندى ءسوز تىركەستەرى، ياعني جۇيەلى قاتەلەر ىرىكتەلگەن.
«ارينە، بۇدان كەيىن ءتىل تازالىعىنىڭ ماسەلەسى بىردەن شەشىلىپ كەتەدى دەۋگە بولماس. الايدا ءبىز وسى باعىتتا ناقتى قادام جاسادىق. ول ءۇشىن ءتىل ماماندارى بىرنەشە اي بويى ەڭبەك ەتتى. قازاق تىلىنە قاجەتتى تىڭ دۇنيە ازىرلەدى. ءوز اتىمنان جۇمىس توبىنا العىس ايتامىن! سوزدىكتى بۇقارالىق اقپارات قۇرالدارىنا، ۋنيۆەرسيتەتتەرگە، مەملەكەتتىك ورگاندارعا تاراتامىز. سايتقا سالۋدى دا كوزدەپ وتىرمىز. سوزدىك جۋرناليستەردىڭ، تىلشىلەردىڭ، جالپى جازارمان قاۋىمنىڭ كۇندەلىكتى قاجەتىنە جارايدى دەپ ۇمىتتەنەمىن. سەبەبى كوپشىلىك ءتىلىنىڭ قالىپتاسۋىنا اقپارات قۇرالدارىنىڭ اسەرى زور. ارينە، بۇل - ءبىر-ەكى اپتانىڭ نەمەسە ءبىر-ەكى ايدىڭ ىشىندە جاسالعان جۇمىس ەمەس. مۇنى بىلتىر مامىر ايىنان باستاپ قولعا الدىق. ياعني پرەزيدەنت اكىمشىلىگى باسشىسىنىڭ ورىنباسارى رەتىندە تىلگە قاتىستى العاشقى جوبالاردىڭ ءبىرى وسى بولاتىن. ونى كەشەگى - ۇلت ۇستازى - احمەت بايتۇرسىن ۇلىنىڭ تۋعان كۇنىنە وراي وزدەرىڭىزگە تانىستىرۋ بۇيىرىپتى»، - دەدى ول.
ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى مەملەكەتتىك ءتىلدى دامىتۋعا ارنالعان بۇدان دا باسقا ءبىرقاتار ءىرى جوبالار بار ەكەندىگىن، ولاردى ۋاقىتى كەلگەندە وسىلاي تانىستىرىپ وتىراتىندىقتارىن ايتادى.
«اعايىن، قازاق ءتىلىنىڭ ماسەلەسى ءاردايىم نازارىمىزدا. ونىڭ وركەن جايۋىنا ءبارىمىز دە مۇددەلىمىز. ءبىراق ءتىلىمىزدى دامىتۋعا بوس سوزبەن ەمەس، ناقتى ىسپەن ۇلەس قوسۋ كەرەك. بۇل - الەۋمەتتىك جەلىدە ەموتسيامەن پوست جازۋ ەمەس، تۇراقتى ءارى تىنىمسىز ەڭبەكتى تالاپ ەتەتىن باعىت. ناتيجەلى ءارى بىردەن ءبىر دۇرىس جول دا - وسى. پرەزيدەنتىمىز كەشەگى جولداۋىندا ايتقانداي، بولاشاقتا وتانىمىزدا تۇرعىسى كەلەتىن ءار ازامات قازاق ءتىلىن ۇيرەنۋگە دەن قويۋعا ءتيىس. وسى ورايدا، قوعامداعى سىيلاستىق، ءوزارا قۇرمەت، ادامي قارىم-قاتىناسقا سىزات تۇسپەۋى كەرەك. مەن الماتى وبلىسىنداعى ۇڭگىرتاس دەپ اتالاتىن تابيعاتى تاماشا، شاعىن اۋىلدا دۇنيەگە كەلدىم. اجەمىز بەن اتامىزدىڭ وسيەتىن تىڭداپ وستىك. سوندىقتان دا تۋعان ءتىلدىڭ تاعدىرى مەنى ەرەكشە تولعاندىرۋى زاڭدىلىق. وسى رەتتە، قازاق ءتىلى ءۇشىن كۇندەلىكتى قىزمەت ەتىپ جۇرگەن زيالى ازاماتتارمەن، ءتىلدى ۇيرەتىپ جۇرگەن ناعىز پاتريوتتارمەن جۇمىس ىستەۋدى، جۇيەلى جوبالاردى جۇزەگە اسىرۋدى وزىمە مىندەت سانايمىن»، - دەدى داۋرەن ابايەۆ.
ايتا كەتەيىك، بۇگىن ەلوردادا ق ر پرەزيدەنتى قاسىم-جومارت توقايەۆتىڭ العىسوزىمەن بۇقارالىق اقپارات قۇرالدارى ماماندارىنا ارنالعان «سوزتۇزەر» سوزدىگىنىڭ تۇساۋكەسەر ءراسىمى ءوتتى.
ق ر ۇ ع ا اكادەميگى، فيلولوگيا عىلىمدارىنىڭ دوكتورى، پروفەسسور شەرۋباي قۇرمانباي ۇلىنىڭ جەتەكشىلىگىمەن جارىق كورگەن سوزدىكتىڭ تانىستىرىلىمىنا ارنالعان ءىس-شاراعا ق ر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن ابايەۆ قاتىسىپ، سوزدىك قازاق ءتىلىن تۇعىرىنا نىق قوندىرۋعا ارنالعان ناقتى جوبا ەكەندىگىن باسا ايتتى.
