جامبىل وبلىسىنداعى جارىلىس: تاعى ءبىر اسكەري قىزمەتشى قازا تاپتى
«جامبىل وبلىسىندا ءورت شىققان اسكەري بولىمدە تاعى ءبىر اسكەري قىزمەتشىنىڭ قازا تاپقانى بەلگىلى بولدى. ءورت ءسوندىرۋ كومانداسىنىڭ باستىعى، كەلىسىمشارت قىزمەتىنىڭ ستارشيناسى 1992 -جىلى دۇنيەگە كەلگەن نادىربەكوۆ ەركىن ەرىكباي ۇلى ينجەنەرلىك وق-دارىلەر قويماسىنداعى ءورتتى ءسوندىرۋ جۇمىستارىنا تىكەلەي جەتەكشىلىك جاساعان. جارىلىستان كەيىن وقيعا ورنىندا قازا تاپقان. ول 27-تامىز كۇنى قايدا ەكەنى تۋرالى مالىمەت جوق اسكەري قىزمەتشىلەردىڭ قاتارىندا بولعان»، - دەلىنگەن قورعانىس مينيسترلىگى تاراتقان اقپاراتتا.
سونىمەن قاتار ۆەدومستۆو قازا تاپقان اسكەري قىزمەتشىنىڭ وتباسىنا جانە جاقىن تۋىستارىنا كوڭىل ايتادى.
«قورعانىس ۆەدومستۆوسىنىڭ باسشىلىعى قازا تاپقان اسكەري قىزمەتشىنىڭ تۋعان-تۋىستارى مەن جاقىندارىنا زور كۇيزەلىسپەن كوڭىل ايتادى جانە بىرگە ازا تۇتادى. قورعانىس مينيسترلىگى ونىڭ وتباسىنا قاجەتتى كومەك كورسەتەدى»، - دەدى مينيسترلىكتەن.
ەستەرىڭىزگە سالا كەتسەك، كەشە ساعات شامامەن 19:00-دە جامبىل وبلىسىنىڭ بايزاق اۋدانىندا ورنالاسقان اسكەري ءبولىم قويمالارىنىڭ بىرىنەن ءورت شىعىپ، جويقىن جارىلىس بولدى. سونىڭ سالدارىنان وسى ۋاقىتقا دەيىن 4 اسكەري قىزمەتشىنىڭ قازا تاپقانى، 3 اسكەري قىزمەتشى مەن توتەنشە جاعدايلار دەپارتامەنتىنىڭ بىرنەشە مامانىمەن بايلانىستىڭ جوقتىعى بەلگىلى بولعان ەدى.
