كوروناۆيرۋستىڭ العاشقى بەلگىلەرى بايقالعاندا ءوز- ءوزىن ەمدەۋمەن اينالىسپاۋدى وتىنەمىن- الەكسەي سوي
بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترى الەكسەي تسوي ءمالىم ەتتى، دەپ حابارلايدى قازاقپارات ءتىلشىسى.
ءمينيستردىڭ ايتۋىنشا، جالپى ەلدىڭ مەديتسينالىق ۇيىمدارى تۇراقتى جۇمىس ىستەپ تۇر. بۇگىندە 120 مىڭنان استام پاتسيەنت كوروناۆيرۋس ينفەكسياسىنان ەمدەلۋدە. دەگەنمەن، العاشقى تاۋلىكتەردە رەانيماتسياعا تۇسكەن ناۋقاستاردىڭ باسىم بولىگى، 40 پايىزدان استامى «دەلتا» شتاممىن جۇقتىرعاندار بولىپ وتىر. اتالعان پاتسيەنتتەر ءوز- ءوزىن ەمدەۋمەن اينالىسقان جانە مەديتسينالىق كومەككە كەش جۇگىنگەن.
«وسىعان وراي جەرگىلىكتى اتقارۋشى ورگاندار حالىق اراسىندا اۋرۋدىڭ الدىن الۋ، ءوز- ءوزىن ەمدەۋگە جول بەرمەۋ جانە مەديتسينالىق كومەككە دەر ۋاقىتىندا جۇگىنۋ ماسەلەلەرى بويىنشا اقپاراتتىق ءتۇسىندىرۋ ءۇشىن جۇمىستارىن كۇشەيتۋى قاجەت. حالىقتان كوروناۆيرۋس ينفەكسياسىنىڭ العاشقى بەلگىلەرى بايقالعاندا مەديتسينالىق كومەككە جۇگىنۋدى جانە ءوز- ءوزىن ەمدەۋمەن اينالىسپاۋدى وتىنەمىن. قاراپايىم ەرەجەلەردى ساقتاۋ جۇزدەگەن ادامنىڭ ءومىرىن قۇتقاراتىندىعىن ەستە ساقتاۋ قاجەت»، - دەدى الەكسەي سوي.
