پورتۋگاليادا ءورت ەلدى مەكەندەرگە جاقىنداپ قالدى
بۇعان دەيىن جەرورتا تەڭىزى جاعالاۋىنداعى ەلدەردى تىعىرىققا تىرەگەن ءتىلسىز جاۋ ەندى پيرەنەي تۇبەگىنە جەتتى. ويتكەنى مۇندا دا كۇن ىستىق. ماسەلەن پورتۋگاليادا اۋا تەمپەراتۋرا 40 گرادۋسقا تاياپ قالدى رەسەيدە دە وت ىرىق بەرەر ەمەس. تۇركيادا سۋ تاسقىنىنان كەيىن ىزدەستىرۋ- قۇتقارۋ جۇمىستارى جالعاسىپ جاتىر. ال گايتيدە بۇل دا جوق. ويتكەنى جۇيەلى جۇمىس جۇرگىزۋگە تروپيكالىق داۋىل كەدەرگى بوپ تۇر.
پورتۋگاليادا ورمان ءورتى كەشە تاڭەرتەڭ باستالعان. ارتىنان ماماندار ونى باقىلاۋعا العان ەدى. الايدا قازىر مۇندا كۇن ىستىق. تەمپەراتۋرا 40 گرادۋسقا جاقىنداپ قالدى. ونىڭ ۇستىنە كۇشتى جەل سوعىپ، وت قايتادان ءورشىدى. بۇل جولى ءتىلسىز جاۋدى اۋىزدىقتاۋ مۇمكىن بولماي تۇر. ءورت ەلدىڭ وڭتۇستىگىندەگى بىرنەشە اۋىلعا تاياپ قالدى. بيلىك دەر كەزىندە ەۆاكۋاتسيا جاريالاعاندىقتان، زارداپ شەككەندەر بولعان جوق.
بليتس 1:
- وت ءۇيىمىزدىڭ قاسىنا جەتتى. كەتۋدەن باسقا امال قالمادى. باسقا تۇرعىندار دا قاۋىپسىز جەرگە كوشىرىلدى.
بليتس 1: - قاتتى قورىقتىق. اينالاڭ ورتەنىپ جاتقانىن كورۋ وڭاي ەمەس. ياكۋتيادا دا ورمان ءورتى ەلدى مەكەندەرگە تاياپ قالدى. قاۋىپتى ايماققا 7 اۋىل كىرىپ وتىر.
ياكۋتيادان بولەك قازىر يركۋتسك وبلىسى مەن ۋرالدىڭ وڭتۇستىگىندە القاپتار ورتەنىپ جاتىر. جالپى بيىل رەسەيدە ءتىلسىز جاۋ شارپىعان اۋماق 17 ميلليون گەكتاردان اسىپ كەتتى. بۇل سوڭعى 9 جىلداعى رەكوردتىق كورسەتكىش. ساراپشىلار الداعى ۋاقىتتا بۇل ساندار تەك ارتا تۇسەتىنىن بولجاپ وتىر.
الەكساندر ماكانوۆ، ورماندى قورعاۋ قىزمەتىنىڭ وكىلى:
- ءۇيىمدى ساعىندىم. مۇندا جۇرگەنىمىزگە 47 كۇن بولدى. بىزگە جاڭبىر كەرەك.
بۇعان دەيىن تۇرىك حالقى دا ورمان ءورتىنىڭ زاردابىن تارتقان ەدى. ارتىنشا تۇرعىنداردى سۋ تاسقىنى ابىگەرگە سالدى. سوڭعى دەرەك بويىنشا تابيعات اپاتى قۇرباندارىنىڭ سانى 77 ادامعا جەتكەن. وڭىردە ىزدەستىرۋ- قۇتقارۋ جۇمىستارى جالعاسىپ جاتىر. ويتكەنى ءىز- ءتۇزسىز جوعالىپ كەتكەن 40 تان اسا تۇرعىننىڭ تاعدىرى ازىرگە بەيمالىم.
گايتيدە دە قۇرباندار سانى ارتتى. وتكەن اپتانىڭ سوڭىندا مۇندا 7,2 بالدىق جەر سىلكىنىسى بولعان ەدى. سوڭعى مالىمەتكە سايكەس، 1419 ادام كوز جۇمعان. وڭىردە ىزدەستىرۋ- قۇتقارۋ جۇمىستارى جالعاسىپ جاتىر. الايدا ەلگە «گرەيس» تروپيكالىق داۋىلى تاياپ قالدى. تۇننەن بەرى جاڭبىر جاۋىپ تۇر. سالدارىنان ءزىلزالادان زارداپ شەككەن تۇرعىندارعا ارنالعان لاگەردى سۋ باسقان. ماماندار لاي كوشكىنى ءجۇرۋ قاۋپى بارىن ەسكەرتىپ وتىر.
