وڭتۇستىك وڭىردەن قونىس اۋدارعان باعبان س ق و- دا قاۋىن- قاربىز ءوسىردى

س ق و ياۆلەنكا ەلدى مەكەنىنىڭ تۇرعىنى عاني ەردوسوۆ وڭتۇستىك ءوڭىردىڭ تۋماسى. بىلتىر مەملەكەتتىك باعدارلاما اياسىندا قونىس اۋداردى. تۇركىستان وبلىسىندا ول 30 جىلعا جۋىق باعباندىقپەن اينالىسقان ەكەن. قاۋىن- قاربىز ءوسىرۋدى جەتىك مەڭگەرگەن ەر ادام ەندى سول ءبىلىمى مەن تاجىريبەسىن جاڭا مەكەندە قولدانباق. جىلۋ سۇيگىش وسىمدىكتەر سولتۇستىك ءوڭىردىڭ اۋا رايىندا ادەتتە وسە قويماسا دا، بىلىكتى مامان ورايىن تاۋىپ، بۇل جەردە باعبانشىلىقتى دامىتپاق.

«باعبانشىلىقپەن بۇرىننان اينالىسامىن. وڭتۇستىكتە مەنىڭ ءوز باقشام بولاتىن. س ق و- عا كەلگەننەن كەيىن ءوزىم بىلەتىن ىسپەن اينالىسۋدى ءجون سانادىم. ماعان بۇل جەردە وتە ۇنايدى، تاماشا. توپىراعى قۇنارلى، ءبىراق اۋا رايى سالقىنىراق. جاز ىستىق بولعان جاعدايدا جاقسى ءونىم الۋعا بولادى. بيىل اۋداندىق اكىمدىك ۇيىمداستىرعان كونكۋرسقا قاتىسىپ، 14 گ ا جەردى الدىم. كەلەسى جىلى ول ۋچاسكەگە قاۋىن- قاربىز ەگەمىن»، - دەيدى عاني ەردوسوۆ.

باعباندىق - وتباسىلىق كاسىپ. باقشانى كۇتىپ باپتاۋعا عانيگە ۇلدارى كومەكتەسەدى. ەكەۋى ستۋدەنت بولسا، ەكەۋى مەكتەپتە وقيدى. ايەلى - مەدبيكە.

«تامشىلاتىپ سۋارۋ ءادىسىن قولدانعان ءجون. ول ءۇشىن ۇڭعىما قازدىرامىن. قاربىزدى 10 كۇندە ءبىر رەت، ءبىراق ءشولى قانعانشا سۋارۋ قاجەت. ءبىر تۇپكە ورتا ەسەپپەن 5-7 ليتر سۋ كەرەك. اسا كۇتىمدى دە قاجەت ەتپەيدى. بيىل بۇل جاقتا بىرىنشە رەت ەككەندىكتەن قاربىزدىڭ «گوللاند» سۇرىپى جانە «تۇرىكمەن» قاۋىنىن تاڭدادىم. ولار وسىنداي اۋا رايىنا بەيىمدەلگەن، جاقسى جەتىلەدى»، - دەيدى عاني ەردوسوۆ.

باعباننىڭ ايتۋىنشا، سولتۇستىك قازاقستاندا دا قاربىز بەن قاۋىننان جاقسى ءونىم الۋعا بولادى. ءبىراق ول ءۇشىن قاجەتتى تەحنولوگيانى ساقتاعان ءجون. ياعني اۋا رايىنا بەيىمدەلگەن سۇرىپتى تاڭداپ، دۇرىس سۋارىپ، توپىراقتى مەزگىلىندە مينەرالدى تىڭايتقىشتارمەن بايىتىپ وتىرۋ كەرەك.

اۆتور: اقەركە داۋرەنبەك قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى