پرەزيدەنت: بەيبىت زاماندا جاقىندارىمىزدى جوعالتپاۋىمىز كەرەك
«كوروناۆيرۋستىڭ جاڭا تولقىنى جويقىن بولىپ وتىر. سوڭعى كۇندەرى جۇزدەگەن ازاماتىمىزدان ايىرىلىپ قالدىق. ءار وڭىردە اۋرۋحاناعا تۇسكەن ناۋقاستاردىڭ سانى كۇرت كوبەيدى. جانساقتاۋ بولىمدەرىنىڭ بارلىعى ىسكە قوسىلدى. قوسىمشا ءدارى-دارمەك پەن قۇرال-جابدىق ساتىپ الىندى»، - دەدى مەملەكەت باسشىسى ەلدەگى سانيتارلىق- ەپيدەميولوگيالىق احۋال جونىندەگى جۇمىس كەڭەسىندە.
پرەزيدەنت ۆيرۋس قازاقستاندىقتاردىڭ ەڭ نازىك تۇستارىنا سوققى بولىپ ءتيىپ جاتقانىن اتادى.
«بۇل كۇرەستە ءبىزدىڭ اعا بۋىن زارداپ شەگۋدە، بۇدان دا جامانى - بالالار ىندەتكە شالدىعۋدا. ءوزىڭىزدى جانە جاقىندارىڭىزدى وسى قاۋىپتەن قورعاۋدىڭ جالعىز جولى - ۆاكسيناتسيا. الەمدىك مەديتسينا ازىرگە بۇدان باسقا ادىستەردى ۇسىنعان جوق جانە جاقىن بولاشاقتا ۇسىنۋى ەكىتالاي»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، ۆاكسينا - بۇل ءوزىمىزدى جانە وتباسىمىزدى قورعاۋدىڭ جالعىز مۇمكىندىگى.
«ءبىزدىڭ بالالار ءبىزدىڭ قاتەلىكتەرىمىز ءۇشىن اقى تولەمەۋى كەرەك! بەيبىت ۋاقىتتا جاقىندارىمىزدى جوعالتپاۋىمىز كەرەك. ەلىمىزدىڭ ءار ازاماتىنا ايتارىم: دەنساۋلىقتى ساقتاڭىزدار، تۋعان-تۋىستىڭ، وتباسىنىڭ اماندىعىن ويلاڭىزدار! ال، ۇكىمەت پەن ءوڭىر باسشىلارى بەلگىلەنگەن مىندەتتەردىڭ ءبارىن ءمىنسىز اتقارۋعا ءتيىس»، - دەپ تۇيىندەدى مەملەكەت باسشىسى.
