قازالىلىق ديقان تامشىلاتىپ سۋارۋ ادىسىمەن مول ءونىم الدى

جەرگىلىكتى ديقان نۇرلىبەك نۇرقوجايەۆ تامشىلاتىپ سۋارۋ ادىسىمەن 3,5 گەكتار جەرگە قاربىز ەكتى. العاشقى ءونىم شىلدە ايىنىڭ باسىندا تۇتىنۋشىلارعا جول تارتتى. جانە ونى تۇرعىندارعا قولجەتىمدى باعادا ساتىپ وتىر.

«بيىل وڭىردە سۋ تاپشىلىعى ماسەلەسى ەرەكشە سەزىلىپ وتىر. وبلىس باسشىلىعى تاراپىنان سۋ ۇنەمدەلەتىن داقىلداردى ەگۋگە ماڭىز بەرىلدى. سوندىقتان تامشىلاتىپ سۋارۋ ادىسىنە كوڭىل ءبولدىم. قاربىزدىڭ 55 كۇندە پىسەتىن «Бомбикс F1»دەيتىن سورتىن ەكتىم. سۋدى ۇنەمدەپ قانا قويماي، تىڭايتقىشتى دا ارنايى تۇتىك بويىمەن جىبەرەمىز»، - دەدى ن. نۇرقوجايەۆ.

تامشىلاتىپ سۋارۋعا قاجەتتى قۇرال- جابدىقتارعا 3,7 ميلليون تەڭگە جۇمسالعان. ونىڭ 2 ميلليون تەڭگەسىنە «بيزنەستىڭ جول كارتاسى 2020-2025» مەملەكەتتىك باعدارلاماسى ارقىلى قول جەتكىزگەن. باعدارلاما اياسىندا ءوزىنىڭ يننوۆاتسيالىق يدەياسىن قورعاپ، 2 ميلليون تەڭگە گرانت ۇتىپ العان. ەرتە پىسكەن قاربىزدى اۋدان تۇرعىندارىمەن قاتار، كورشىلەس ارال جانە قارماقشى اۋداندارىنان دا كەلىپ، ساتىپ الۋدا. قاربىزدىڭ «Бомбикс F1» دەپ اتالاتىن سورتى بۇگىنگى تاڭدا ەكىنشى رەت ءونىم بەرىپ جاتىر. ودان بولەك، جاقىندا «پروديۋسەر» دەپ اتالاتىن سورتى پىسەدى. ال 1 گەكتار جەرگە اسقاباق پەن قيار دا ەككەن.

«قازالى اۋدانىندا توپىراقتىڭ سور بولۋىنا بايلانىستى باقشا ەگەتىن شاعىن شارۋالارعا جەر تەگىستەيتىن تەحنيكا اۋاداي قاجەت. سەبەبى باقشادان مول ءونىم الۋ ءۇشىن مىندەتتى تۇردە جەر تەگىس بولىپ، سۋمەن بىرنەشە قايتارا شايىپ الۋ ماڭىزدى»، - دەيدى ن. نۇرقوجايەۆ.

ديقاننىڭ جۇمىسىمەن تانىسقان قازالى اۋدانىنىڭ اكىمى مۇحتار ورازبايەۆ قولىنان ءىس كەلەتىن ازاماتتاردى ءاردايىم قولدايتىنىن ايتتى. ەسكە سالا كەتسەك، بۇعان دەيىن ارال اۋدانى شارۋالارىنا جەم- ءشوپتىڭ جەتكىزىلە باستاعاندىعىن حابارلاعان بولاتىنبىز.

اۆتور: ءادىلجان ۇمبەت

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى