تيمۋر مۇراتوۆ دەلتا شتامىنىڭ ەرەكشەلىكتەرى تۋرالى ايتىپ بەردى

ونىڭ ايتۋىنشا، كوروناۆيرۋستىڭ «دەلتا» شتامىندا اۋرۋدىڭ اسا اۋىر ءتۇرى بايقالىپ وتىر. سونىمەن قاتار، بۇل شتامم اسا بىلىنە قويمايتىندىقتان جۇقتىرعان ادام اۋىرعانىن بايقاماي قالۋى دا مۇمكىن. «دەلتا» شتامىنىڭ ەرەكشەلىكتەرى: ول اگرەسسيۆتى، العاشقى ۋاقىتتا ءىش قاتتى اۋىرادى، ياعني پاتسيەنتتەردىڭ كوبىسى ءىشى، اسقازانى اۋىراتىنىن ايتىپ جاتادى. ال پ ت ر تەست العان كەزدە ناۋقاستاردىڭ وكپەگە ايتارلىقتاي زاقىم كەلگەنى انىقتالىپ جاتىر»، - دەدى قالالىق قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆ.

ونىڭ ايتۋىنشا، «دەلتا» شتامى وتە جىلدام جۇعادى. ونىڭ ينكۋباتسيالىق كەزەڭى 7 كۇننەن اسپايدى، كوپتەگەن ناۋقاستا 3-4 كۇندە ءىشى اۋىرىپ، 5-6-كۇندەرى جوتەلىپ، وكپەسى زاقىمدالادى. دەگەنمەن، باسقارما باسشىسى ۆيرۋس قالاي مۋتاتسيالانسا دا ونىمەن كۇرەستە ۆاكسينا ءتيىمدى بولىپ قالا بەرەتىنىن ايتتى. ول سونداي-اق ەكپەنىڭ قالاي اسەر ەتەتىنىن ءتۇسىندىرىپ بەردى.

«جاڭادان ۆاكسيناتسيالانعان ادام ۆيرۋس تاسىمالداۋشى بولا الا ما؟ بۇل مۇمكىن ەمەس، ول ادامدا ءتىرى ۆيرۋس جوق. ول اعزادا كوبەيمەيدى. ۆاكسينانىڭ ماقساتى - يممۋنوكومپەتەنتتى جاسۋشالارعا جەتۋ جانە ولاردى قوزدىرۋ ارقىلى، يممۋنوگلوبۋلين تۇرىندە جاۋاپ الۋ، ياعني انتيدەنە شىعارادى. بۇل جاسۋشانىڭ جادى پايدا بولادى جانە ول ۆيرۋس كەلگەندە جەتكىلىكتى مولشەردە انتيدەنە شىعارا باستايدى. ياعني، اعزانى قورعاۋ ءۇشىن بەلگىلى ءبىر مولشەردە انتيدەنەلەر ءاردايىم قاننىڭ قۇرامىندا بولادى»، - دەپ ءتۇسىندىردى دەنساۋلىق ساقتاۋ باسقارماسىنىڭ باسشىسى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى