پرەزيدەنت بەلگىلى ايتىسكەر اقىن حانشا رايسوۆانىڭ جاقىن تۋىستارىنا كوڭىل ايتتى
مەملەكەت باسشىسى قاسىم-جومارت توقايەۆ كورنەكتى مادەنيەت قايراتكەرى، رەسپۋبليكالىق اقىندار ايتىسىنىڭ بىرنەشە دۇركىن جۇلدەگەرى، الماتى وبلىسىنىڭ قۇرمەتتى ازاماتى حانشا مۇساباي قىزى رايسوۆانىڭ دۇنيەدەن وتۋىنە بايلانىستى كوڭىل ايتۋ جەدەلحاتىن جولدادى.
«حانشا مۇساباي قىزى 1980-1990 -جىلدارى ايتىس ونەرى قايتا جاندانعان تۇستا جارق ەتىپ كورىنگەن اقىنداردىڭ ءبىرى ەدى. ول مادەني قۇندىلىقتارىمىزدى جانە رۋحاني قازىنامىزدى دارىپتەپ، ەل ىشىندەگى جانە حالىقارالىق جىر سايىستارىندا جۇلدەلى ورىنداردى جەڭىپ الدى. ەل- جۇرتتىڭ ايرىقشا قۇرمەتى مەن ىقىلاسىنا بولەندى. يۋنەسكو سىيلىعىنىڭ لاۋرەاتى اتاندى. جاس ونەرپازداردى ءسوز زەرگەرى بولۋعا باۋلىپ، جەتىسۋ وڭىرىندە اقىندار مەكتەبىن قالىپتاستىرۋعا اتسالىستى. قازاقتىڭ ايتىس اتتى ادەبي مۇراسىن وركەندەتۋگە مول ۇلەس قوسقان حانشا مۇساباي قىزىنىڭ جارقىن بەينەسى ۇمىتىلمايدى. حالقىمىز بەلگىلى اقىننىڭ ەسىمىن ءاردايىم ارداق تۇتادى»، - دەپ جازىلعان پرەزيدەنتتىڭ جەدەلحاتىندا.
ەسكە سالا كەتسەك، بۇگىن رەسپۋبليكالىق اقىندار ايتىسىنىڭ بىرنەشە دۇركىن جۇلدەگەرى، الماتى وبلىسىنىڭ قۇرمەتتى ازاماتى حانشا رايسوۆا دۇنيەدەن وتكەن حابارلانعان ەدى. حالىقارالىق يۋنەسكو سىيلىعىنىڭ لاۋرەاتى، اقىندار مەكتەبىنىڭ ۇستازى حانشا مۇساباي قىزى 1956 -جىلى 5-قازاندا الماتى وبلىسى قاپال اۋدانى قوڭىر اۋىلىندا دۇنيەگە كەلگەن.
1989 -جىلدان باستاپ ءارتۇرلى دەڭگەيدەگى جىر سايىستارىنا قاتىسا باستادى.
«قازاق ءتىلى» قوعامى ۇيىمداستىرعان رەسپۋبليكالىق ايتىستا باس جۇلدە (1990)، ابايدىڭ 150 -جىلدىعىنا ارنالعان حالىقارالىق ايتىستا Ⅲ ورىن (1995) يەلەنگەن. ق ح ر- دا، رەسەيدە، وزبەكستاندا، سونداي-اق وبلىس اۋقىمىندا وتكەن ايتىستاردا بىرنەشە رەت ارناۋلى جۇلدەگە يە بولدى.
