قازاقستاننىڭ وليمپيادا كومانداسى توكيوعا كەلىپ جەتتى

نۇر-سۇلتان مەن توكيو اراسىنداعى ۇشۋ ۇزاقتىعى 7 ساعات 15 مينۋتتى قۇرادى، دەپ حابارلايدى قازاقپارات ۇلتتىق وليمپيادا كوميتەتىنە سىلتەمە جاساپ.

تالاپقا ساي دەلەگاتسيانىڭ 128 مۇشەسى كوروناۆيرۋستى ينفەكسياعا بايلانىستى پ ت ر تەست تاپسىردى. قازاقستاندىقتار تاپسىرعان بۇكىل تەست تەرىس ناتيجە كورسەتتى. كوماندانىڭ اۋەجايداعى بارلىق پروتسەدۋراسى 4 ساعاتقا جۋىق ۋاقىتقا سوزىلدى.

«ۇيىمداستىرۋشىلاردىڭ تالابى بويىنشا بارلىق رەگلامەنتتى ساقتادىق. ەرەجە بويىنشا سوڭعى ءتورت ساعاتتا سپورتشىلار كوروناۆيرۋستى ينفەكتسياعا قاتىستى بەس تەست تاپسىردى. قازىرگى تاڭدا ولار وليمپيادا اۋىلىنا جايعاسىپ، تىنىعۋدا. جاقىن ۋاقىتتا كەستەگە سايكەس جاتتىعۋدى باستايدى»، - دەپ حابارلادى وليمپياداداعى قازاقستان ميسسياسىنىڭ باسشىسى ەلسيار قاناعاتوۆ.

17 -شىلدە كۇنى توكيوداعى كۇن رايى اشىق، اۋا تەمپەراتۋراسى 32 گرادۋسقا دەيىن كوتەرىلگەن. ىلعالدىلىق 52 پايىزدى كورسەتىپ تۇر. 18 -شىلدەدەن باستاپ سپورتشىلار جاتتىعۋعا كىرىسىپ، دارىگەرلەردىڭ باقىلاۋىمەن ىستىق ءارى ىلعالدى كليماتقا بەيىمدەلەدى. 18 -شىلدە كۇنى وليمپيادا اۋىلىنا سپورتتىق گيمناستيكا مەن اكادەميالىق ەسۋدەن كوماندا وكىلدەرى جايعاسادى.

23 -شىلدە كۇنى وليمپيادا ويىندارىندا العاش بولىپ ءتورت قازاقستاندىق سپورتشى باق سىنايدى. ساداق اتۋدان ىرىكتەۋ كەزەڭىندە س انجار مۇسايەۆ، يلفات ابدۋللين، دەنيس گانكين سىنعا تۇسسە، اكادەميالىق ەسۋدەن ۆلاديسلاۆ ياكوۆليەۆ جارىستى باستايدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى