مال ۇرلاۋمەن اينالىسقان ەكى ادام ۇستالدى
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، مامليۋت اۋدانىنداعى اۋىلداردىڭ بىرىندە باقتاشىنىڭ بايلاۋداعى جىلقىسى جوعالادى. ءوز كۇشىمەن ىزدەۋ ەش ناتيجە بەرمەدى. كەيىن تابىن يەسى مامليۋت اۋدانىنىڭ پوليتسيا بولىمىنە جۇگىنگەن. ۋاقىت وتكەندىكتەن قىلمىسكەردى ءىزىن سۋىتپاي ۇستاۋ مۇمكىن بولمادى. الايدا پوليتسەيلەر جەدەل-ىزدەستىرۋ ءىس- شارالارى ناتيجەسىندە ەكى كۇدىكتىنى انىقتادى. ونىڭ ءبىرى - قىزىلجار اۋدانىنىڭ بۇرىن مۇلىكتىك قىلمىستار جاساعانى ءۇشىن سوتتالعان 34 جاستاعى تۇرعىنى بولىپ شىقتى.
بيىل ول ەسكى ادەتىنە باسىپ، جامبىل اۋدانىندا ەكى قوي ۇرلاعانى ءۇشىن ۇستالدى. سول كەزدە ەر ادام مال يەسىمەن تاتۋلاسىپ، جازادان قۇتىلدى. ەندى ونىڭ جابىرلەنۋشىلەردىڭ كەشىرىمىن الۋىنا جول جوق. ەكىنشىسى - بۇرىن قاراقشىلىق ءۇشىن سوتتالعان 43 جاستاعى پەتروپاۆل تۇرعىنى. كۇدىكتىلەردىڭ اۋدان اۋماعىندا تاعى ءبىر جىلقى مەن ءۇش قوشقاردى ۇرلاۋعا قاتىسى بارى انىقتالدى. اتالعان فاكتىلەر «مال ۇرلاۋ» بابى بويىنشا سوتقا دەيىنگى تەرگەپ-تەكسەرۋلەردىڭ ءبىرىڭعاي تىزىلىمىنە ەنگىزىلدى.
«كۇدىكتىلەردىڭ ايتۋىنشا، ولار جالعا العان كولىكپەن ەركىن جايىلىمدا جۇرگەن نەمەسە قاراۋسىز قالعان مالداردى اڭدىعان. كەيىن مالداردى ءبىرىنىڭ جەر ءۇيىنىڭ اۋلاسىندا مۇشەلەگەن، سول ءۇشىن قاساپشىلاردىڭ قىزمەتىن پايدالانعان. قاىرگى ۋاقىتتا كۇدىكتىلەر تەرگەۋ يزولياتورىندا قاماۋدا وتىر»، - دەيدى اۋداندىق پوليتسيا ءبولىمى باستىعىنىڭ مىندەتىن اتقارۋشى يسا مۇستافين.
جىل باسىنان وبلىستا 18 مال ۇرلاۋ فاكتىسى تىركەلىپ، بۇگىنگى تاڭدا ونىڭ 16-سى اشىلدى.
اۆتور: اقەركە داۋرەنبەك قىزى
