وليمپياداشىلار توكيوعا اتتاندى - فوتو

قازاقستان ۇ و ك باسپا ءسوز قىزمەتى ءمالىم ەتكەندەي، الماتىدان ءبىرىنشى رەيسپەن 128 ادام توكيوعا اتتاندى. ولاردىڭ قاتارىندا سپورتشىلار، باپكەرلەر، دارىگەرلەر، عىلىمي- كەشەندى توپ مۇشەلەرى، وليمپياداداعى قازاقستان ميسسياسىنىڭ وكىلدەرى بار.

توكيوعا «اقبۇلاق» وليمپيادالىق بازاسىنان كاراتەشىلەر، ساداق اتۋشىلار، ۇستەل تەننيسى مەن سەمسەرلەسۋ كومانداسى، اۋىر اتلەتتەر مەن بوكسشىلار اتتاندى. وزگە دە جاتتىعۋ بازالارىنان ءجۇزۋ سپورتىنىڭ، سۋ دوبى سپورتىنىڭ وكىلدەرى، جەڭىل اتلەتتەر، ۆەلوشاباندوزدار، ستەند اتۋ مەن نىسانا كوزدەۋدەن قۇراما كوماندالار، سونداي- اق، دزيۋدوشىلار دا توكيوعا جول تارتتى.

«اتلەتتەر ەكى اپتالىق كارانتيندە بولىپ، سوڭعى جاتتىعۋ جيىندارىن الماتى قالاسى مەن الماتى وبلىسىندا وتكىزدى. ويىن قارساڭىنداعى سوڭعى كۇندەردى سپورتشىلار وقشاۋلانۋ رەجيمىندە وتكىزىپ، سىرتقى الەممەن بايلانىسقا تۇسكەن جوق»، - دەلىنگەن حابارلامادا.

«ءبىز وليمپيادا ويىندارىنا قاتىسۋشى سپورتشىلاردىڭ قاۋىپسىزدىگىنە باعىتتالعان حوك پەن توكيو-2020 ۇيىمداستىرۋ كوميتەتىنىڭ بارلىق تالاپتارىن ورىندادىق. ۇلتتىق وليمپيادالىق كوميتەت پەن ۇلتتىق فەدەراتسيالار سپورتشىلاردىڭ ساپالى ءارى ءقاۋىپسىز دايىندالۋىنا بار جاعدايدى جاسادى. ءبىزدىڭ كومانداداعى 96 سپورتشى ورتاق ەڭبەگىمىزدىڭ جەمىسى. سپورتشىلار مەن باپكەرلەرگە، سونداي- اق، سپورتتىق دارىگەرلەرگە بىرلەسكەن جۇمىسى ءۇشىن راحمەت ايتامىز»، - دەلىنگەن ۇلتتىق وليمپيادالىق كوميتەتتىڭ جازباسىندا.

دەلەگاتسيانىڭ العاشقى بولىگى چارتەرلىك رەيسپەن الماتىدان توكيوعا ۇشىپ كەتتى. وسى ورايدا، بارلىق قاۋىپسىزدىك شارالارى ساقتالعان. دەلەگاتسيانىڭ اەروپورت جانە اۋەكومپانيا قىزمەتكەرلەرىمەن بايلانىسقا مەيىلىنشە از ءتۇسۋى قاداعالانۋدا. اۆياتسيالىق قىزمەتكەرلەردىڭ بارلىعى دا ەكى مارتە پ ت ر سىناقتان ءوتتى. 28-شىلدەگە جوسپارلانعان ەكىنشى رەيسپەن جاپونياعا 43 ادام جول تارتادى. ولاردىڭ قاتارىندا بالۋاندار، كوركەم گيمناستيكادان قازاقستان كومانداسى، ارتىستىك ءجۇزۋ، بەسسايىس جانە جەڭىل اتلەتتەردىڭ ءبىر بولىگى بار. جاتتىعۋ كەزىندە ارنايى سپورتتىق بازالاردى قاجەت ەتكەن سپورتشىلاردىڭ شامامەن ۇشتەن ءبىر بولىگى كارانتين مەن دايىندىقتىڭ اقىرعى كەزەڭىن شەتەلدە وتكىزدى. ولار تىكەلەي توكيونى بەتكە الادى.

8-شىلدەدەن باستاپ جاپونيادا وليمپيادا ويىندارىنداعى قازاقستان ميسسياسى جۇمىسىن باستادى. قازاقستان ەلشىلىگى مەن س ءى م قولداۋى ارقىلى سپورتشىلارمەن كەزدەسۋگە قاجەتتى زاتتار مەن جاتتىعۋعا كەرەكتى قوسىمشا قۇرىلعىلاردىڭ بارلىعى دا دايىندالدى. وليمپيادا اۋىلىنداعى تىرشىلىك تە كارانتين تالاپتارىنا ساي بولماق.

ءتۇرلى ەل كوماندالارىنىڭ، ءارتۇرلى سپورت تۇرلەرىندەگى اتلەتتەردىڭ ءوزارا بايلانسۋىنا تىيىم سالىنعان. وليمپيادالىق اۋىل مەن جاتتىعۋ جانە سپورت زالدارىنىڭ اراسىنداعى مارشرۋتتان اۋىتقۋعا بولمايدى، قوعامدىق كولىكتى پايدالانۋعا رۇقسات جوق. كوروناۆيرۋسقا بايلانىستى كۇن سايىن تەست تاپسىرۋ مىندەتتى سانالادى.

سونىمەن قاتار، سپورتشىلاردىڭ جۇرگەن ورنى مەن دەنساۋلىق جاعدايىن باقىلايتىن بىرنەشە قوسىمشالاردى ۇيالى تەلەفونعا ورناتۋ مىندەتتەلەدى. قازاقستان وليمپيادالىق كومانداسىنىڭ ساپىندا 97 ليتسەنزيا جەڭىپ العان 96 سپورتشى بار. وليمپيادا ويىندارىنىڭ اشىلۋ سالتاناتى 23-شىلدە كۇنى نۇر-سۇلتان ۋاقىتىمەن 17:00-دە توكيو ستاديونىندا باستالادى.

اۆتور: كۇنسۇلتان وتارباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى