ش ق و- دان تابىلعان ارتەفاكتىلەر بابامىزدىڭ مەتاللۋرگيانى مىقتى مەڭگەرگەنىن كورسەتەدى - دانيال احمەتوۆ
ۇلان اۋدانىنداعى اقباۋىر ارحەولوگيالىق كەشەنىنە بارعان ايماق باسشىسى دانيال احمەتوۆ وسىنداي پىكىر ايتتى. ايماق باسشىسى ەلەكە سازى ۇستىرتىندەگى ارحەولوگيالىق جۇمىستاردىڭ بارىسىمەن تانىستى. وندا ەرتە ساق داۋىرىنەن باستاپ ورتا تۇركى كەزەڭىنە دەيىنگى بىرنەشە وبادان تۇراتىن ۇلكەن قورىم تابىلدى. الەمگە ايگىلى عالىم زەينوللا ساماشيەۆ ءۇش جىلدان بەرى وسىندا قازبا جۇمىستارىن جۇرگىزىپ كەلەدى.
تاريحشى عالىمدار مەن ارحەولوگتاردىڭ جۇمىسىنىڭ ارقاسىندا ايماقتىڭ قازىرگى تۇرعىندارىنىڭ ەجەلگى اتا- بابالارى وسى جەردە وتىرىقشى ءومىر سالتىن ۇستانعانى جانە ءارتۇرلى سالالاردا، سونىڭ ىشىندە مەتالل ءوندىرۋ جانە وڭدەۋ سالاسىندا ۇلكەن جەتىستىككە جەتكەنى بەلگىلى بولدى. تابىلعان ارتەفاكتىلەر مەن قۇرالدار بالقىتىلعان مەتالدان ءتۇرلى بۇيىمدار جاسايتىن «شەبەرحانالار» بولعانىن ايعاقتايدى. جۇرگىزىلگەن قازبا جۇمىستارى ەجەلگى قازاقتاردىڭ اۋىل شارۋاشىلىعى سالاسىمەن اينالىسىپ، جەردى يگەرۋدە وتە ساۋاتتى بولعانىن دالەلدەيدى.
«وسى جەردەن تابىلعان جانە الداعى ۋاقىتتا دا تابىلاتىن ەكسپوناتتار ءبىزدىڭ مۇراجايلارىمىزدىڭ قورىن تولىقتىرىپ قانا قويماي، قازاقستان تاريحىنا قاتىستى كوپتەگەن سۇراقتارعا جاۋاپ بەرەتىنىنە سەنىمدىمىن. بۇدان بولەك، تاعى 20 ۋچاسكە بار، ولاردى دا مۇقيات زەرتتەۋ قاجەت»، - دەدى عالىمدارمەن كەزدەسكەن وبلىس اكىمى دانيال احمەتوۆ.
ايتا كەتۋ كەرەك، ارحەولوگ زەينوللا ساماشيەۆ باستاعان زەرتتەۋشىلەر شىعىس قازاقستاننىڭ اقباۋىر شاتقالىنان ساق زامانىنان بەرى ساقتالعان مەتاللۋرگيالىق جادىگەرلەردى تاپقان بولاتىن. اقباۋىر ارحەولوگيالىق كەشەنىنىڭ قازبا جۇمىسىنا قازاقستاندىق عالىمدارمەن بىرگە حالىقارالىق ەكسپەديتسيا مۇشەلەرى جانە سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتىنىڭ، شاكارىم اتىنداعى ۋنيۆەرسيتەتتىڭ، گەودەزيا جانە كارتوگرافيا جوعارى كوللەدجى مەن رەسپۋبليكانىڭ باسقا دا وقۋ ورىندارىنان وتىزدان استام ستۋدەنت قاتىسىپ جاتىر. سونىمەن قاتار، مۇندا تابىلعان ارتەفاكتىلەردى زەرتتەيتىن جىلجىمالى زەرتحانا دا بار.
