قاراعاندى وبلىسىنان توكيو وليمپياداسىنا باراتىن سپورتشىلار بەلگىلى بولدى

توكيودا وتەتىن XXXI جازعى وليمپيادا ويىندارى قارساڭىندا وبلىس اكىمى سپورتشىلارمەن جانە ولاردىڭ تالىمگەرلەرىمەن اڭگىمەلەستى. كەزدەسۋ ونلاين فورماتتا ءوتتى، دەپ حابارلايدى قازاقپارات ءتىلشىسى.

قاراعاندى وبلىسى دەنە شىنىقتىرۋ جانە سپورت باسقارماسىنىڭ باسشىسى تەمىرحان ابىلايەۆ وليمپيادالىق ليتسەنزيا يەگەرلەرىنىڭ ەسىمدەرىن اتادى. «جەتى سپورتشىمىز التى ليتسەنزيا جەڭىپ الدى. ولار: ابىلايحان ءجۇسىپوۆ (بوكس)، ەلميرا سىزدىقوۆا (ايەلدەر كۇرەسى)، الەكساندرا جانە ەكاتەرينا نەميچ (سينحروندى ءجۇزۋ)، جانساي سماعۇلوۆ پەن يسلام بوزبايەۆ (دزيۋدو)، ماريا وۆچيننيكوۆا (جەڭىل اتلەتيكا). ءبىزدىڭ وڭىردەن پاراليمپياداعا سپورتشىلار جەتى ليتسەنزيا جەڭىپ الدى. پاراليمپيادا سپورت كوميتەتىنىڭ شەشىمى بويىنشا ونىڭ تەك ەكەۋىنە كۆوتا بەرىلدى. ۇلتتىق قۇراماعا داستان مۇقاشبەكوۆ (جەڭىل اتلەتيكا) جانە ءاليا راحىمبەكوۆا (ءجۇزۋ) كىردى»، - دەدى تەمىرحان ابىلايەۆ.

جەڭىس قاسىمبەك وبلىستا سپورتقا ەرەكشە كوڭىل بولىنەتىنىن اتاپ ءوتتى. فۋتبول الاڭدارى مەن زاماناۋي دسك- لار سالىنۋدا، زاماناۋي سپورت نىساندارى تاپسىرىلادى، وبلىستىڭ بارلىق اۋىلدارى مەن قالالارىندا سپورت زالدارى جوندەلىپ جاتىر. سپورتشىلاردىڭ جالاقىسى ارتتى. ولار مەديتسينالىق قىزمەتپەن تولىق قامتاماسىز ەتىلگەن.

«سىزدەر 1,5 جىلدان بەرى كۇردەلى جاعدايدا جاتتىعىپ كەلەسىزدەر. قازىرگى جاعداي بارىمىزگە اسەر ەتەدى. ءبىراق وسىنىڭ بارلىعىنا قاراماستان، ءبىز سىزدەردىڭ جەڭىستەرىڭىزدى اسىعا كۇتەمىز جانە سىزدەرگە ۇلكەن تابىس تىلەيمىز»، - دەدى ايماق باسشىسى.

ەستەرىڭىزگە سالا كەتەيىك، توكيودا جازعى وليمپيادا ويىندارى 23-شىلدە مەن 8-تامىز ارالىعىندا، پاراليمپيادا ويىندارى 24-تامىز بەن 5-قىركۇيەك ارالىعىندا وتەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى