الماتى اكىمدىگى قالا تۇرعىندارىنا ۇندەۋ جولدادى

الماتى قالاسى اكىمىنىڭ ورىنباسارى ەرجان باباقۇماروۆ اۋماقتىق سانيتارلىق- ەپيدەميولوگيالىق باقىلاۋ دەپارتامەنتىنىڭ باسشىسى، قالانىڭ باس مەملەكەتتىك سانيتارلىق دارىگەرى جانداربەك بەكشين جانە قالانىڭ باس يمامى تولەبي وسپانمەن بىرگە كارانتيندىك جاعدايلاردا «قۇربان ايت» مەيرامىن مەرەكەلەۋ بويىنشا ونلاين كەڭەس وتكىزدى.

كەڭەسكە اۋداندار اكىمدىكتەرىنىڭ جانە جاۋاپتى باسقارمالاردىڭ باسشىلىعى قاتىستى. ەرجان باباقۇماروۆ قازىرگى كۇردەلى ەپيدەميولوگيالىق جاعدايعا باسا نازار اۋداردى. سوڭعى تاۋلىكتە مەگاپوليستە كوروناۆيرۋس ينفەكسيانىڭ 850 جاعدايى تىركەلدى.

وسىعان بايلانىستى بيىل ۆيرۋستىڭ ودان ءارى تارالۋىن بولدىرماۋ ماقساتىندا «قۇربان ايت» مەرەكەسى ونلاين رەجيمدە وتەدى. قايىرىمدىلىقتى qurban2021.kz سايتىنا ءوتىنىم بەرۋ ارقىلى ونلاين جاساۋعا بولادى. كەڭەس بارىسىندا، سونداي-اق قۇرباندىققا شالىناتىن جانۋارلاردى ساتۋ كەزىندە قالالىقتاردىڭ دەنساۋلىعىن «دەلتا» شتاممىن جۇقتىرۋدان قورعاۋ ماسەلەلەرى تالقىلاندى. باستى مىندەت - كوروناۆيرۋس ينفەكتسياسىنىڭ تارالۋ قاۋپىن ازايتۋ. اكىمنىڭ ورىنباسارى ەرجان باباقۇماروۆ قالالىق باسقارمالار مەن اۋدانداردىڭ اكىمدىكتەرىنە، ۆەتەرينارلىق جانە ءتيىستى قىزمەتتەرگە مەرەكە كەزىندە ينفەكتسيانىڭ الدىن الۋ جانە كارانتيندىك شەكتەۋلەردىڭ ساقتالۋىنا باقىلاۋدى كۇشەيتۋ جونىندە قاجەتتى شارالار قابىلداۋدى تاپسىردى.

ايتا كەتسەك، «قۇربان ايت» مەرەكەسىنىڭ ونلاين فورماتى وتكەن جىلى ەنگىزىلگەن بولاتىن. شەكتەۋلەر بارلىق ۇيىمداردا، سونىڭ ىشىندە جەكە ءۇي شارۋاشىلىقتارى مەن مەدرەسەلەردە ادامداردىڭ جاپپاي جينالۋى ارقىلى ءىس-شارالار وتكىزۋگە تىيىم سالۋدى كوزدەدى. سونىمەن قاتار، اۆتوكولىكتەردەن جانە جەكە ءۇي شارۋاشىلىقتارىنان مال سويۋعا تىيىم سالىنادى، قۇرباندىق شالۋعا ارنايى بولىنگەن جەردى قوسپاعاندا، بۇكىل قالا بويىنشا مال سويۋ تسەحتارى مەن بازارلارىنىڭ جۇمىسى توقتاتىلدى.

اۆتور: الما مۇقانوۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى