قارسىلاسىنىڭ ءبارىن نوكاۋتپەن جەڭگەن سۋپەراۋىر سالماقتاعى قازاقستاندىقتىڭ كەلەسى ايقاسى بەلگىلەندى
وليمپيادا جۇلدەگەرىنىڭ الداعى جوسپارى تۋرالى Vesti.kz تىلشىسىنە ونىڭ مەنەدجەرى زيا اليەۆ ايتىپ بەردى.
«تامىزدا ءبىر ايقاس ۇيىمداستىرۋدى جوسپارلاپ وتىرمىز. بۇل كەزدەسۋگە دايىندىقتى ماياميدە وتكىزەدى. يۆان جەكپە-جەكتى بەلگىلەنگەن ۋاقىتىن تولىق جۇدىرىقتاساتىنداي مىقتى قارسىلاس تاڭدايمىز.
جىل سوڭىنا دەيىن بەلسەندى بولادى. تامىزدى ەسەپكە الماساق، تاعى ەكى ايقاس جوسپاردا بار. جالپى ءۇش جەكپە-جەك. بۇل جوسپارىمىز وزگەرىسسىز قالادى دەپ ۇمىتتەنەمىن»، - دەيدى اليەۆ.
ەسكە سالايىق، 30 جاستاعى دىچكو كەيىنگى جەكپە-جەگىن 10- شىلدەدە الماتىدا وتكىزىپ، رەسەيلىك دەنيس باحتوۆتى نوكاۋتقا تۇسىرگەن. بۇل ونىڭ ەكى جىلدىق ۇزىلىستەن كەيىن رينگكە قايتا ورالۋى بولدى جانە قازاقستاندا وتكىزگەن ءبىرىنشى كەزدەسۋى.
