قۇرباندىق شالاتىن ورىندارعا بارۋ ءۇشىن الدىن الا جازىلۋ قاجەت - ءدىني باسقارما
وعان بارۋ ءۇشىن الدىن الا جازىلۋ كەرەك، دەپ حابارلايدى قازاقپارات ءتىلشىسى.
«ءار وڭىردەگى ق م د ب جۇمىس توبىنىڭ call-ورتالىققا قوڭىراۋ شالىپ، الدىن الا جازىلۋ كەرەك. ارنايى ءتىزىم جاسالىپ، قۇربان شالۋعا نيەتتى تۇلعاعا كەزەك سانى مەن باراتىن ناقتى ۋاقىتىن حاباردار ەتۋى قاجەت. ءبارى بىردەي ءبىر ۋاقىتتا بارماۋ ءۇشىن، اركىم تالون سەكىلدى ءوز كەزەگىمەن بارىپ قۇرباندىق شالادى»، - دەپ ءتۇسىندىردى ق م د ب ءتوراعاسىنىڭ ورىنباسارى، نايب ءمۇفتي ەرشات وڭعار ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
20- شىلدە كۇنى ساعات 7:20 دان باستاپ «سارى»، «جاسىل» ايماقتاعى وڭىرلەردە الدىن الا جازىلعان تۇلعالار بەلگىلەنگەن ۋاقىتتا ارنايى قاساپحانادا قۇربان شالادى، ءاربىر ادامعا 1 ساعات ۋاقىتتان بەرىلەدى.
«وفلاين فورماتتا قۇربان شالۋشى ق م د ب- نىڭ جاۋاپتى تۇلعاسىنا «ASHYQ» باعدارلاماسىنداعى ءوز ستاتۋسىن كورسەتۋى قاجەت. «جاسىل» جانە «كوك» تۇستەردەگى تۇلعالار قاساپحانا عيماراتىنا كىرە الادى، «قىزىل» جانە «سارى» تۇستەردەگى تۇلعالارعا رۇقسات ەتىلمەيدى»، - دەيدى ە. وڭعار.
قۇرباندىق ەتىن ەت ساقتايتىن ورىندارعا جونەلتۋ جانە جەتكىزۋمەن ەرىكتىلەر، يمامدار اينالىسادى. بۇل تەگىن بولادى. قۇربان ەتتەرىن جاعدايى تومەن وتباسىلار، جەتىمدەر مەن قارتتار ءۇيى جانە الەۋمەتتىك جاعدايى وسال توپتارعا تاراتىلادى.
«قاسپاحانالاردا تازالىققا ءمان بەرىلىپ، سانيتارلىق تالاپتاردىڭ ساقتالۋىن قاتاڭ قاداعالاۋدى قولعا الدىق. كۇنى كەشە باس ءمۇفتي جۇمىس توبىمەن بىرگە قاساپحانا تازالىعىن، مال سوياتىن ورىندار مەن سويىلاتىن مالدى كورىپ قايتتى. قۇرباندىق مالىن سويدىرۋعا، ساتىپ الۋعا، ساتۋ، ونى سويۋ كەزىندە سانيتارلىق تالاپتار، تازالىق جاعىنا ءمان بەرۋگە شاقىرامىز. دىنىمىزدە تازالىقتىڭ ماڭىزى جوعارى»، - دەدى ەرشات وڭعار.
