ەلىمىزدەگى تاۋ تۋريزىمىن دامىتۋدا قانداي جۇمىستار اتقارىلۋدا؟
بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە الماتى قالاسى تۋريزم باسقارماسى باسشىسىنىڭ ورىنباسارى مارلەن مارالوۆ ءمالىم ەتتى، دەپ حابارلايدى قازاقپارات ءتىلشىسى.
ونلاين بريفينگ بارىسىندا، مارلەن مارالوۆ اۆتوبۋستار جۇرەتىن تۇراقتى تاۋ باعىتتارىن اتاپ ءوتتى.
«الماتى اگلومەراتسياسىنىڭ تاۋلى كۋرورتتارىندا تۋريستەردىڭ كوبەيۋىن ەسكەرە وتىرىپ، الماتى قالاسىنىڭ اكىمدىگى 2019-جىلدىڭ ناۋرىز ايىنان باستاپ سپورت سارايىنان 209№، 210№، 211№ باعىتتار بويىنشا گاز ماركالى 9 اۆتوبۋستى ىسكە قوستى. بالۋان شولاق «Ski Park Pioneer» مەن «وي-قاراعاي - لەسنايا سكازكا» تاۋ كۋرورتتارىنا دەيىن، سونداي-اق «المااراسان» شاتقالىنا دەيىن بارادى»، - دەدى تۋريزم باسقارماسى باسشىسىنىڭ ورىنباسارى.
2021-جىلدىڭ ناۋرىز ايىنان باستاپ ورتالىق ستاديوننان بيىك تاۋلى «اق بۇلاق» كۋرورتىنا دەيىنگى 224№ باعدار بويىنشا تاعى ءۇش اۆتوبۋس ىسكە قوسىلدى. بۇل باعىتتار قازىردىڭ وزىندە 80 مىڭنان استام ادامعا قىزمەت كورسەتتى. سونداي-اق سپيكەر تاۋ جولدارىن اباتتاندىرۋ مەن ءتورت كەمپينگ ايماعىن قۇرۋ تۋرالى ايتتى.
«تاۋلى جەرلەردەگى تۋريستىك ينفراقۇرىلىمدى جاقسارتۋ ماقساتىندا 1000 شاقىرىمنان استام جاياۋ ءجۇرۋ مارشرۋتتارى سيفرلاندىرىلدى، ولاردىڭ 500 شاقىرىمى اباتتاندىرىلدى. بارلىق سيفرلانعان باعىتتار 2GIS جانە ViewRanger پلاتفورمالارىندا قولجەتىمدى»، - دەدى ول.
وسى باعىتتار بويىندا اقپاراتتىق ستەندتەر، كورسەتكىشتەر، اقپاراتتىق قالقاندار، اقپاراتتىق باعانالار، ورىندىق پەن كۇركەلەر ورناتىلدى. بارلىق ناۆيگاتسيالىق ستەندتەردە QR- كودتار بار، وندا تۋريستەر مارشرۋتتىڭ كۇردەلىگىمەن ءارى ۇزاقتىعىمەن جانە ءوتۋ ۋاقىتىمەن تانىسا الادى. سونىمەن قاتار، بيىل ۇلكەن جانە كىشى الماتى شاتقالىندا جالپى ۇزىندىعى شامامەن 172 شاقىرىم بولاتىن تاۋ مارشرۋتتارىن اباتتاندىرۋ جوسپاردا.
تۋريزم باسقارماسى باسشىسىنىڭ ورىنباسارى بيىل ۇلكەن الماتى كولىنىڭ ماڭىندا جالپى اۋدانى 950 شارشى مەتر جانە 800 شارشى مەتر ۆيزيت-ورتالىق پەن گلەمپينگتىڭ قۇرىلىسى باستالاتىنىن ءمالىم ەتتى.
«ۆيزيت-ورتالىقتا سانيتارلىق-گيگيەنالىق توراپ، تاماقتانۋ پۋنكتى، جازعى تەرراساسى مەن تەگىن Wi-Fi بار تۋريستىك اقپاراتتىق ورتالىق بولادى. وندا ءاربىر ادام تۋريستىك باعىتتار، سوقپاقتار تۋرالى اقپاراتتىق قىزمەتتەردى، ۇلتتىق پارك اۋماعىنداعى نىسانداردىڭ بايلانىس دەرەكتەرىن، سونداي-اق بارلىق قاجەتتى جايلىلىقتارى بار گلەمپينگتەردى الا الادى»، - دەدى سپيكەر.
بۇدان باسقا، 2022-جىلى Qazaq Ayul اۋماعىندا «مەدەۋ پارك وتەل» قوناق ءۇي كەشەنىنىڭ لوگيكالىق جالعاسى بولاتىن گلەمپينگ-وتەل سالۋ كوزدەلگەن. ول 15 ۇيدەن تۇرادى. وتكەن جىلى جەكە قاراجات ەسەبىنەن «ايۋساي» شاتقالىندا، «گورەلنيك» جىلۋ كوزىنەن جوعارى، «مەدەۋ» بازالىق ورتالىعى مەن «شىمبۇلاقتىڭ» ەڭ بيىك نۇكتەسىندە ءتورت ۆيزيت-ورتالىق سالىندى. ساپار ورتالىقتارىندا كەلۋشىلەر مارشرۋت كارتالارىن الادى جانە جولعا شىقپاس بۇرىن قاجەتتى جابدىقتى ساتىپ الادى.
ەڭ باستىسى، تۋريستەر وزدەرى تۋرالى جانە تاڭدالعان باعىت تۋرالى بارلىق اقپاراتتى قالدىرادى. بۇل تاۋدا اداسىپ كەتۋ قاۋپىن ازايتادى جانە قۇتقارۋشىلاردىڭ جۇمىسىن جەڭىلدەتەدى.
ايتا كەتسەك، سوڭعى ەكى جىلدا ت ج د قىزمەتكەرلەرى 178 ادامدى قۇتقاردى.
