جەڭىلمەگەن قازاق بوكسشىلارى
ولاردىڭ ءارقايسىسى كاسىبي سپورتتاعى مانسابىن ءساتتى جالعاستىرىپ، چەمپيوندىق اتاققا قول جەتكىزۋدى باستى ماقساتى سانايدى. ءبىز ءسوز ەتكەلى وتىرعان رينگ تورىندە قارسىلاستارىن قوعاداي جاپىرىپ جۇرگەن كۇرزى جۇدىرىق يەلەرى كىمدەر؟ اڭگىمە اۋانىن سول ساڭلاقتارعا اۋدارايىق.
ەل سپورتشىلارىنىڭ اراسىندا قانات يسلام مەن جانقوش تۇراروۆتىڭ كاسىپقوي بوكستاعى جەڭىلىسسىز سەرياسى وزگە بوكسشىلارعا قاراعاندا الدەقايدا كوپ. كۇزدە 37 جاسقا تولاتىن قانات يسلام 28 كەزدەسۋدىڭ 22 سىن ۋاقىتىنان بۇرىن اياقتاعانى بار. وسى جىلى 31 جاسىن تويلايتىن جانقوشتىڭ قاتارىنان 24 كەزدەسۋدە باق جۇلدىزى جاندى. ونىڭ 17 سىن مەرزىمىنەن بۇرىن اياقتادى.
ءبىراق قوس سپورتشىنىڭ دا جاسى ءبىرازعا كەلدى. اسىرەسە، قاناتتىڭ ەندىگى چەمپيوندىق اتاققا تالاسا الاتىنىنا سەنەتىندەر از. ال جانقوشقا ەندىگى كەزەكتە تەك مىقتى قارسىلاستارمەن جۇدىرىقتاسقان ءجون. ايتپەسە، ونىڭ دا قاتارداعى ورتاڭقول بوكسشىلاردان ەش ايىرماشىلىعى بولماي قالارى انىق.
داڭقى جەر جارعان روككي مارچيانو مەن فلويد مەيۆەزەردىڭ كورسەتكىشىن قايتالاۋى مۇمكىن دەگەن وتاندىق بىلعارى قولعاپ شەبەرلەرى اراسىنان دانيار ەلەۋسىنوۆ (10-0، 6 ك و) پەن جانىبەك ءالىمحان ۇلىنىڭ (10-0، 6 ك و) ەسىمى ەرەكشە اتالادى. دانيار قازىرگى ۋاقىتتا ەركىن اگەنت. ول وتكەن ايدا عانا Matchroom Boxing كومپانياسىمەن ارىپتەستىگىن توقتاتتى.
وتانداسىمىز سوڭعى كەزدەسۋىن بىلتىر قاراشادا وتكىزگەن ەدى. بۇرىنعى الەم چەمپيونى دجۋليۋس يندونگونى جەڭىپ، ورتا سالماقتاعى IBF Intercontinental بەلدىگىن يەمدەندى.
ال جانىبەك كەيىنگى وتكىزگەن لاس- ۆەگاستاعى بوكس كەشىندە بۇرىنعى الەم چەمپيونى، 30 جاستاعى امەريكالىق روب برانتتى جەڭدى. جەكپە- جەك ورتا سالماق دارەجەسىندە ءوتتى جانە ون راۋندقا ەسەپتەلدى. التىنشى راۋندتا ءالىمحان ۇلى امەريكالىقتى نوكداۋنعا جىبەردى. ال سەگىزىنشى راۋندتان كەيىن برانت جەكپە- جەكتى جالعاستىرۋدان باس تارتتى. قوس بوكسشىنىڭ دا قازىر 10 جەكپە- جەكتە 10 جەڭىسى بار.
ءبىز ءوز كەزەگىمىزدە جوعارىدا اتاپ وتكەن بوكسشىلاردىڭ كاسىپقوي بوكستاعى قارىم-قابىلەتى، دەڭگەيى، شاما-شارقى تۋرالى وتاندىق بوكس ماماندارىنان سۇرادىق. قازاقستاننىڭ ەڭبەك سىڭىرگەن جاتتىقتىرۋشىسى نۇرلان اقۇرپەكوۆ قازاقستاندىق بوكسشىلاردىڭ ەشقايسىسىن ءبولىپ- جارعىسى كەلمەيتىنىن ايتادى.
- كاسىپقوي بوكستا بارلىق بوكسشىلارىمىز دا ءتاۋىر ونەر كورسەتىپ ءجۇر. كوپشىلىگى ءبىزدىڭ ءتالىمىمىزدى العان جىگىتتەر. دانيارعا دا وڭ باتامدى بەرگەنمىن. جانىبەك تە سەنىمدى اقتاپ ءجۇر. ايدوس ەربوسىن ۇلى دا قازاقتىڭ اتىن الەمگە شىعارسام دا جۇرگەن بوكسشى. سادريدديننىڭ دە ۇمتىلىسى قۋانتادى. تۇرسىنباي قۇلاحمەت، بەكمان سويلىبايەۆتارعا ءالى دە تاجىريبە جيناقتاۋ كەرەك.
كاسىپقوي بوكستا جۇرگەن وتانداستارىمىزدىڭ رەيتينگتە ورنى جوعارىلاعان سايىن قارسىلاستارى دا مىقتى بولا تۇسەتىنى بەلگىلى. كاسىپقوي بوكستىڭ ەرەكشەلىگى سول عوي. ۇزدىك وندىقتىڭ ىشىنە كىرگەننەن كەيىن ناعىز جەكپە-جەكتەر باستالادى. تيتۋلعا تالاس، تيتۋلدى قورعاۋ اينالاسىندا كەزدەسۋلەر وتەدى، - دەيدى بىلىكتى مامان.
ال حالىقارالىق دارەجەدەگى سپورت شەبەرى، Qazaq boxing زالىنىڭ جاتتىقتىرۋشىسى مۇحيت امانتايەۆ الداعى 2-3 جىلدىقتا قازاقستاندىقتار اراسىنان الەم چەمپيوندارى شىعاتىنىنا سەنەتىنىن جەتكىزدى.
- دانيار ەلەۋسىنوۆ ءالى دە ۇزدىك بوكسشىلارمەن كەزدەسۋ وتكىزگەن جوق دەپ ويلايمىن. ءبىراق مەن وليمپيادا چەمپيونىنان كوپ ءۇمىت كۇتەمىن. بولاشاقتا ءبىر- ەكى جىلدىقتا الەم چەمپيونى اتاناتىن شىعار. ال قانات يسلامنىڭ جاسى قىرىققا كەلىپ قالدى. الەمدىك دەڭگەيدە كەرەمەت جەتىستىكتەرگە جەتەدى، الەم چەمپيونى بولادى دەپ ايتا المايمىن. قانات ول ۋاقىتتان الدەقاشان ءوتىپ كەتتى. 5-6 جىل بۇرىن مۇمكىندىگى بولعان. سادريددين احمەدوۆ جاس، بولاشاعىنان ءۇمىت كۇتتىرەتىن بوكسشى. كانادادا ءبىراز ۋاقىت جاتتىقتى. جىلىنا 4-5 كەزدەسۋ وتكىزىپ، اتاق- ابىرويى بار، تانىمال بوكسشىلارمەن شىعىپ، ءوزىن كورسەتە الاتىن بوكسشى.
تۇرسىنباي قۇلاحمەتتىڭ كاسىپقوي بوكستاعى كەزدەسۋلەرىن كورمەدىم. ءبىراق اۋەسقوي بوكستاعى جەكپە- جەكتەرىن كوردىم. ازىرگە بەتالىسى جامان ەمەس. جولى اشىق بولعاي. كوپ ماماندار ماقتاپ جاتىر. ايدوس ەربوسىن ۇلى دا جەڭىلىسسىز كەلە جاتىر. وعان بوكس مانەرىن، تەحنيكاسىن وزگەرتۋى كەرەك سەكىلدى. مىقتى قارسىلاستارمەن دە كەزدەسۋ وتكىزگەنى ءجون. ايتپەسە، ورتا دەڭگەيلى بوكسشىلاردىڭ ءبىرى بولىپ قالادى. ازىرگە رەيتينگى جوعارى.
سوندىقتان قارسىلاس تاڭداۋدا قاتەلەسپەۋ كەرەك. جان كوسوبۋتسكيي دە مىقتى قارسىلاستارعا جولىقپادى. مەيىرىم نۇرسۇلتانوۆ امەريكادا ماديار اشكەيەۆپەن بىرگە جاتتىعىپ ءجۇر. ول ازىرگە كاسىپقوي بوكستا جاقسى كەلە جاتىر. كەزدەسۋ وتكىزبەگەلى دە ءبىراز بولدى. كارانتين دە كەسىرىن تيگىزىپ جاتقان بولسا كەرەك. الداعى ۋاقىتتا جاعداي جاقسارسا ءوزىن جاقسى قىرىنان كورسەتەدى ءالى، - دەيدى جاتتىقتىرۋشى.
بوكس ماماندارىنىڭ كاسىپقوي رينگتە جەڭىستى سەرياسىن جالعاپ جۇرگەن بىلعارى قولعاپ شەبەرلەرىنە بەرگەن باعاسى وسىنداي. ەڭ باستىسى، ساڭلاقتارىمىز الەمدىك ارەنادا جەڭىستى جولىنان جاڭىلماي، قازاق بوكسىنىڭ ابىرويىن اسقاقتاتا تۇسسە ەكەن.
«ايقىن» گازەتى
