بالا ءسۇيۋدى جوسپارلاعان جۇپتار ۆاكسينادان بوساتىلا ما - مامان جاۋابى
«جاقىن ايلاردا جاس جۇبايلار بالا ءسۇيۋدى جوسپارلاسا، ەكەۋى دە كوروناۆيرۋسقا قارسى ۆاكسينالاۋدان بوساتىلا ما؟ ۆاكسينالاۋدان كەيىن ءبىراز ۋاقىت بالا كوتەرۋگە قارسى كورسەتىلىمدەر بولماي ما؟»، - دەگەن سۇراق قويىلدى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا.
«ەگەر جاس جۇبايلار جاقىن ارادا بالالى بولۋدى جوسپارلاسا، ۆاكسينالاۋدان كەيىن ءبىر اي (21-28 كۇن) جۇكتىلىكتەن ساقتانۋعا كەڭەس بەرەمىز. سوندىقتان، جاس جۇبايلارعا كەيىن اۋىرىپ قالماۋ ءۇشىن، اسىرەسە جۇكتى كەزىندە بولاشاق انانىڭ قورعالۋى ءۇشىن الدىن الا ۆاكسينا سالدىرۋعا كەڭەس بەرەمىز. ۆاكسينادان كەيىن ءبىر اي ساقتانۋ كەرەك. مەنىڭ ويىمشا، بۇل اسا ۇزاق ۋاقىت ەمەس»، - دەپ جاۋاپ بەردى روزا قوجاپوۆا.
بۇعان دەيىن ق ر د س م ساراپشىلارى ۆاكسينانىڭ ءبىرىنشى دوزاسىن العان ايەلدەر جۇكتى ەكەنىن بىلگەندە نە ىستەۋى كەرەك دەگەن سۇراققا جاۋاپ بەردى.
«ەگەر ايەل ۆاكسينانىڭ العاشقى دوزاسىن الىپ، كەيىن جۇكتى ەكەنىن بىلسە، قورقىنىشتى ەشتەڭە جوق. وعان ەكىنشى دوزا الماۋ تۋرالى مەديتسينالىق انىقتاما بەرەدى. بۇگىنگى تاڭدا جۇكتى ايەلدەرگە ۆاكسينا سالۋ ماسەلەسى الەم بويىنشا تالقىلانىپ، قاراستىرىلىپ جاتىر»، - دەيدى ر. قوجاپوۆا.
