جامبىل وبلىسىندا ۆاكسينالاۋ دەڭگەيى جوعارى اۋدانداردا ىندەت جۇقتىرۋ تومەندەدى
دەنساۋلىق ساقتاۋ باسقارماسىنىڭ باسشىسى اسەت قاليەۆتىڭ ايتۋىنشا، 6-13-شىلدە ارالىعىندا وڭىردە COVID-19 اۋرۋىنىڭ ءوسۋى بايقالعان.
13-ماۋسىمداعى مالىمەتتەرگە سايكەس، وبلىس بويىنشا 10 381 ادام ينفەكسيا جۇقتىرعان. تەك سوڭعى تاۋلىكتىڭ وزىندە ك ۆ ي 52 ادامنان راستالعان. قازىرگى ۋاقىتتا ينفەكسيالىق ستاتسيونارلاردا 2075 توسەك- ورىن، ونىڭ ىشىندە 202 - رەانيماتسيالىق بولىمشەلەردە، تاعى 170 - كارانتيندىك ستاتسيونارلاردا دايىندالعان. قوسىمشا 2685 توسەك-ورىن، ونىڭ ىشىندە 299 - رەانيماتسيادا ورنالاستىرۋ مۇمكىندىگى بار.
«بايزاق، جامبىل، ت. رىسقۇلوۆ اۋداندارىندا جانە تاراز قالاسىندا ينفەكسيانىڭ جوعارىلاۋ دەڭگەيى بايقالادى»، - دەدى اسەت قاليەۆ. ول 582 مىڭ جامبىلدىقتى ۆاكسيناتسيالاۋمەن قامتۋ جوسپارلانىپ وتىرعانىن اتاپ ءوتتى. بۇگىنگى كۇنى جوسپار 41,5 پايىزعا ورىنداعان. 43 ەگۋ پۋنكتىنىڭ 15 ى تارازدا، 28 ى اۋدانداردا ورنالاسقان. باسقارما باسشىسى ۆاكسيناتسيا قارقىنى ارتىپ كەلە جاتقان اۋدانداردا ەپيدەميولوگيالىق احۋالدى قالىپقا كەلتىرۋدىن تۇراقتى ءۇردىسى بايقالاتىنىن ايتتى.
«دۇنيەجۇزىلىك دەنساۋلىق ساقتاۋ ۇيىمى پاندەميانىڭ جاڭا كەزەڭىنىڭ قاۋىپتىلىگى تۋرالى ەسكەرتۋدە. ءبىز بارلىق جاعدايعا دايىن بولۋىمىز كەرەك. وتكەن قاتەلىكتەردى ەسكەرىپ، ولارعا قايتا جول بەرمەۋ بويىنشا جۇمىس جاساۋعا ءتيىسپىز»، - دەدى وبلىس اكىمى.
ايماق باسشىسى توسەك-ورىنداردى دايىنداۋدى، ءدارى-دارمەكتەر مەن جەكە قورعانىس قۇرالدارىنىڭ قاجەتتى قورىن قالىپتاستىرۋدى، كەرەكتى قۇرال- جابدىقتاردى ساتىپ الۋدى، قولدانىستاعى ءو ج ج- اپپاراتتارىنىڭ جاي- كۇيىن تەكسەرۋدى تاپسىردى. سونىمەن قاتار، بەردىبەك ساپاربايەۆ اۋدان اكىمدەرىنە، مەملەكەتتىك ورگانداردىڭ باسشىلارىنا ءتۇسىندىرۋ جۇمىستارىن كۇشەيتۋ، حالىقتى كوروناۆيرۋستىق ينفەكسياعا قارسى ۆاكسيناتسيالاۋدى كەڭەيتۋدىڭ ماڭىزدىلىعىن جەتكىزدى. سانيتارلىق- ەپيدەميولوگيالىق باقىلاۋ دەپارتامەنتىنىڭ باسشىسى ءبايدىلدا شىناليەۆ موبيلدىك توپتاردىڭ شەكتەۋ شارالارىنىڭ ساقتالۋىن باقىلاۋ بويىنشا جۇمىستارى ويداعىداي ورىندالماي وتىرعانىن جەتكىزدى.
«سوڭعى كۇندەرى سارىسۋ، مويىنقۇم، جۋالى اۋداندارىندا رەيدتەر قورىتىندىسى بويىنشا كارانتيندىك شەكتەۋلەردىڭ بىردە-ءبىر بۇزىلۋى انىقتالماعان. بۇلاي بولۋى مۇمكىن ەمەس. كەز كەلگەن ساۋدا ورتالىعىنا بارساڭىز، ساتۋشىلار دا، ساتىپ الۋشىلار دا بەتپەردە تاقپايتىنىن كورەسىزدەر. بيزنەس نىساندارىنىڭ قىزمەتكەرلەرى تۇرعىنداردان بەتپەردە تاعۋدى تالاپ ەتىپ، انتيسەپتيكتەر ۇسىنۋى كەرەك. ەگەر كىمدە- كىم سانيتارلىق نورمالاردى ساقتاعىسى كەلمەسە، ولاردى جاۋاپكەرشىلىككە تارتۋ قاجەت»، - دەپ تالاپ ەتتى وبلىس اكىمى.
كەڭەسكە قاتىسۋشىلار موبيلدىك توپتاردىڭ قۇرامىن قايتا قاراۋ تۋرالى شەشىم قابىلدادى. بەردىبەك ساپاربايەۆ شەكاراداعى باقىلاۋدى دا كۇشەيتۋ قاجەتتىگىنە نازار اۋدارتتى.
