جامبىلدا كوپ بالالى اكەلەر جاردەماقىنى زاڭسىز الىپ كەلگەن
ونىڭ بارىسىندا مەملەكەتكە 14 ميلليون تەڭگەدەن استام زالال كەلگەنى انىقتالدى، دەپ حابارلايدى قازاقپارات ءتىلشىسى.
اتالعان بۇزۋشىلىقتاردى ق ر سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى انىقتاعان. بۇل تۋرالى دەپارتامەنت باسشىسىنىڭ ءبىرىنشى ورىنباسارى راۆيل تولەبايەۆ «Antikor» ورتالىعىندا وتكەن بريفينگتە ايتتى.
سپيكەردىڭ ايتۋىنشا، كوپ بالالى وتباسىنا جاردەماقى تاعايىنداۋ كەزىندە وتباسى قۇرامىندا ءتىرى تۋعان، اسىراپ الىنعان، سونداي- اق قامقورلىققا الىنعان بالالار، ەگەر ولار باسقا اتا-اناسىنىڭ وتباسىندا ەسكەرىلمەگەن بولسا، جيىنتىق بالالار ەسكەرىلەدى. ءوز كەزەگىندە اتالعان قاعيدانىڭ 9-تارماعىنا سايكەس، ءوتىنىش بەرۋشى بىرگە تۇراتىن بالالاردىڭ كوپبالالى وتباسىنا جاردەماقى تاعايىنداۋ تۋرالى وتىنىشتە كورسەتە وتىرىپ، بالالاردىڭ بىرلەسكەن تۇرعىلىقتى مەكەنجايىن راستايدى. بۇل رەتتە ق ر ازاماتتىق كودەكسىنىڭ 16-بابىنا سايكەس ون ءتورت جاسقا تولماعان بالالاردىڭ زاڭدى وكىلدەرىنىڭ تۇراتىن جەرى ولاردىڭ تۇرعىلىقتى جەرى بولىپ تانىلادى.
«ەرلى- زايىپتىلار اراسىندا نەكە بۇزىلعان جاعدايدا اتا- انانىڭ بىرەۋىمەن بالالاردىڭ بىرگە تۇرۋى سوت شەشىمىمەن راستالادى. الايدا، بىرنەشە جاردەماقى الاتىن ازامات وتىنىشىندە بالالارى بىرگە تۇرادى دەپ كورسەتكەنىمەن، سوت شەشىمىمەن ولاردىڭ شەشەسىمەن تۇراتىنى بەلگىلى بولعان»، - دەيدى ر. تولەبايەۆ.
«ازاماتتارعا ارنالعان ۇكىمەتتەن» كوپبالالى وتباسىلارعا بەرىلەتىن جاردەماقىنىڭ اتا- انالار اراسىنان تەك اكەسى تاراپىنان ءوتىنىش بىلدىرگەندەر تۋرالى اقپارات سۇراتىلىپ، ول ءتىزىم بويىنشا قالالىق سوت شەشىمىمەن سايكەستەندىرىلىپ، قارالدى.
«باس تارتىلعان قالعان ىستەر بويىنشا جاردەماقى الۋشىلار ارتىق تولەنگەن سومانى ەرىكتى تۇردە قايتارۋعا مىندەتتەنىپ وتىر. زەرتتەۋ بارىسىندا 27 تولەم الۋشى بويىنشا 14337143 تەڭگە ارتىق تولەمدى قۇرادى. ارتىق تولەنگەن سومادان 150000 مىڭ تەڭگە رەسپۋبليكالىق بيۋدجەتكە قايتارىلدى. كوپ بالالى وتباسىلار، ادەتتە، از قامتىلعاندىقتان، اقشالاي قاراجاتتى قايتارۋدى ولار بىرتىندەپ جۇرگىزىلەدى. سونداي-اق، تاعى 38 تولەم الۋشى بويىنشا ءتيىستى جۇمىس جۇرگىزىلىپ جاتىر. ال 18 تولەم الۋشى اي سايىن جاردەماقىنى الۋ ءۇشىن، وتىنىمدەرىندە دۇرىس ەمەس اقپارات ەنگىزۋ ارقىلى بىرگە تۇراتىن بالالار سانىن كوبەيتكەن. اتالعان ازاماتتاردىڭ ءىس- ارەكەتىندە الاياقتىق بەلگىلەرىنىڭ بايقالۋىنا بايلانىستى شەشىم قابىلداۋ ءۇشىن پوليتسيا دەپارتامەنتىنە جولداندى»، - دەيدى دەپارتامەنتتىڭ باسقارما باسشىسى داۋرەن وماروۆ.
جاردەماقىنىڭ زاڭسىز تاعايىندالۋىنا اكەپ سوققان باستى فاكتوردىڭ ءبىرى - كورسەتىلەتىن قىزمەت ستاندارتىندا ازاماتتارعا ارنالعان ۇكىمەت قىزمەتكەرلەرىنىڭ قۇجات قابىلداۋ كەزىندە سوت شەشىمىن تالاپ ەتۋ قۇقىعىنىڭ بولماۋى.
ەڭبەك، الەۋمەتتىك قورعاۋ جانە كوشى- قون كوميتەتىنىڭ جامبىل وبلىسى بويىنشا دەپارتامەنتىنىڭ اقپاراتىنا سايكەس قازىرگى تاڭدا 124 ادامنىڭ ىشىنەن 59 وتباسى جاردەماقىنى زاڭعا سايكەس الىپ وتىر.
«27 ءىس ءوتىنىش بەرۋشىنىڭ بىرگە تۇراتىنى تۋرالى جالعان مالىمەت ۇسىنۋىنا بايلانىستى باس تارتىلدى. ونىڭ ىشىندە 2 تولەم الۋشى بويىنشا اكەسىمەن بىرگە تۇرمايتىن بالالاردى ەسەپكە الماي، جاردەماقى مولشەرىن ازايتۋ جاعىنا قاراي قايتا ەسەپتەۋ تۋرالى شەشىم بەكىتىلدى»، - دەدى ەڭبەك، الەۋمەتتىك قورعاۋ جانە كوشى-قون كوميتەتىنىڭ جامبىل وبلىسى بويىنشا دەپارتامەنتى باسشىسىنىڭ م. ا. رايحان نازاروۆا.
اۆتور: سايا سەمباي
