ەرلى-زايىپتىلار قارىم-قاتىناسىن ءمىنسىز ەتەتىن ەكىلىك جۇيە
وتباسىلىق ومىردە ەكى ادامعا ۇلكەن جاۋاپكەرشىلىك جۇكتەلەدى. ويتكەنى مۇنداي قارىم-قاتىناس تەك ماحابباتتان عانا ەمەس، ءوزارا مىندەتتەمەلەر مەن ماسەلەلەردى بىرلەسە شەشۋدەن تۇرادى.
سونىڭ ىشىندە كۇندەلىكتى تىرشىلىك ساناتىنا جاتاتىن كەز كەلگەن ءىس ەكەۋدىڭ ۇنەمى ءبىر-ءبىرىن قولداپ وتىرۋىن تالاپ ەتەدى. ءتىپتى ءمىنسىز ۇيلەسىمدى جۇپتاردىڭ ءوزىنىڭ كۇندەلىكتى ءومىردىڭ شىڭىراۋىنا قۇلاپ كەتۋى عاجاپ ەمەس. ءبىر جاقسىسى، پسيحولوگتار وتاسقان جۇپتاردىڭ قارىم-قاتىناسىن زەرىگۋ مەن توقىراۋدان قورعايتىن قۇپيا فورمۋلامەن بولىسەدى. مۇنداي جۇيەمەن ءومىر سۇرەتىندەر ماحابباتىن ماڭگىلىككە ساقتاپ قالۋعا مۇمكىندىك الادى.
ەكىلىك جۇيە ەرەجەسى ناتيجە بەرۋى ءۇشىن ءۇش قاراپايىم ەسكەرتۋدى ۇستانۋ كەرەك:
1. ەكى اپتا سايىن
جۇمىس كۇندەرى تۇراقتى جالاقىعا عانا ەمەس، تۇراقتى كۇيزەلىسكە دە سەبەپكەر بولادى. سوندىقتان كەشكە قاراي جانىڭىزعا جاقىن ادامىڭىزبەن قيالي تاقىرىپتاردا اڭگىمەلەسۋ، رومانتيكالىق تۇسكى اس ءىشۋ نەمەسە بىرگە قىدىرۋعا مۇمكىندىك بولا بەرمەيدى. سەبەبى، كۇندەلىكتى جۇمىس كوپ ەنەرگيانى قاجەت ەتەتىنى راس. ەشقاشان بىتپەيتىن مۇنداي ىستەردى ەكەۋارا كەلىسىپ ورىنداعان جاعدايدا عانا ەكى ادام ءبىر-بىرىنە كوڭىل بولە الادى. ياعني، تاپسىرمالاردى ءبولۋ: ول بالانى سەرۋەندەتسە، سەن تاماق دايىندايسىڭ. وسىلايشا، ءومىر ءوزارا ءۇنسىز كەلىسىممەن پاراللەل ءوتىپ جاتادى.
سوندىقتان ەرلى-زايىپتىلار كەم دەگەندە ەكى اپتادا ءبىر رەت وڭاشا كەزدەسۋ ۇيىمداستىرۋى كەرەك. بىرگە كەشكى اس دايىنداۋ، كينوتەاترعا بارۋ، ساياباقتا سەرۋەندەۋ سەكىلدى ىستەرمەن اينالىسۋ ماڭىزدى. ەڭ باستىسى - بىرگە بولۋ. بۇل جاقىندىقتى نىعايتادى.
2. ەكى ايدا ءبىر رەت
ەكى ايدا ءبىر رەت ەرلى-زايىپتىلاردى قىسقا مەرزىمدى دەمالىسقا بىرگە شىعۋى كەرەك. دەمالىس كۇندەرى باسقا قالاعا ساياحات جاساۋ، كەمپينگكە اتتانۋ، جاقىن شەتەل شارلاۋ. ەكى ادامعا ارنالعان قىسقا ساپار كۇندەلىكتى كۇيزەلىستەن قۇتىلۋعا، قارىم-قاتىناسىڭىزدى كۇشەيتۋگە كومەكتەسەدى.
3. ەكى جىلدا ءبىر رەت
ءوز بولاشاعىن جارقىن ەتكىسى كەلەتىن ەكەۋ ەكى جىلدا ءبىر رەت كەم دەگەندە 5-7 كۇنگە سوزىلاتىن دەمالىس الۋى كەرەك. بۇل دەمالىستى ورتاق دوس نەمەسە تۋىستارمەن كەزدەسۋگە ەمەس، تەك وڭاشا بولۋعا عانا ارناۋىڭىز ماڭىزدى. قىزمەتتىك ماسەلەلەردەن، كۇندەلىكتى شەشىمدى قاجەت ەتەتىن دۇنيەلەردەن جانە تۋىستارىڭىزدىڭ نازارىنان اۋلاق بولساڭىز، سىزدەر ءوز سەزىمدەرىڭىز ەركىندىك بەرىپ، تەك ەكەۋىڭىزگە عانا تيەسىلى جەكە كەڭىستىك تابا الاسىز.
massaget.kz
