اقمولا وبلىسىندا «قۇربان ايت» ونلاين رەجيمدە عانا وتەدى - قاۋلى

ءوڭىردىڭ باس سانيتار دارىگەرىنىڭ جاڭا قاۋلىسى بويىنشا وڭىردە قوعامدىق تاماقتانۋ نىساندارى مەن ءۇي ىشىندە وتباسىلىق توي- جيىن مەن ەسكە الۋ شارالارىن وتكىزۋگە سالىنعان تىيىم جالعاساتىنى ايتىلعان. پاركتەرگە، الاڭدارعا، سكۆەرلەرگە جانە حالىقتىڭ باسقا دا دەمالىس ورىندارىنا ءۇش ادامنان اسپايتىن توپتارمەن نەمەسە ءبىر وتباسى مۇشەلەرىمەن الەۋمەتتىك قاشىقتىقتى ساقتاي وتىرىپ، جەكە قورعانۋ قۇرالدارىن پايدالانۋ ارقىلى بارۋعا رۇقسات ەتىلەدى.

«اۋداندار مەن كوكشەتاۋ، ستەپنوگورسك قالالارىنىڭ اكىمدەرىنە كوپشىلىك ءىس- شارالاردى، وتباسىلىق ءىس- شارالاردى جانە ادامدار كوپ جينالاتىن وزگە دە ءىس- شارالاردى، ونىڭ ىشىندە ۇيدە، سونداي- اق اشىق اۋادا وتكىزۋگە تىيىم سالۋدى قامتاماسىز ەتۋ تاپسىرىلادى»، - دەپ جازىلعان قۇجاتتا.

ويىن- ساۋىق مەكەمەلەرىنىڭ (تۇنگى، ويىن كلۋبتارى جانە باسقالارى)، بۋكمەكەرلىك كەڭسەلەردىڭ جانە ەرەسەكتەر مەن بالالارعا ارنالعان باسقا دا ويىن- ساۋىق مەكەمەلەرىنىڭ، كاليان مەكەمەلەرىنىڭ، ونىڭ ىشىندە قوعامدىق تاماقتانۋ وبەكتىلەرى جانىنداعى مەكەمەلەردىڭ قىزمەتىنە تىيىم سالىنادى. ال Ashyq جوباسىنا قاتىسپايتىن ورىنداردا كورمەلەر، مارافوندار، مەرەكەلىك كورپوراتيۆتەر، ەسكە الۋ وتكىزۋگە دە تىيىم سالىنادى.

Ashyq جۇيەسىنە كىرمەگەن وبلىس ارالىق، وبلىس ىشىلىك، قالالىق تۇراقتى جانە تۇراقتى ەمەس اۆتوبۋس تاسىمالداۋشىلارعا تۋريستەردى تاسۋى، ويىن الاڭدارى، اتتراكسيوندار مەن جابىق ءۇي- جايلارداعى باتۋتتار قىزمەتى ەپيدەميولوگيالىق احۋال تۇراقتانعانشا توقتاتىلاتىن بولدى. بيليارد، كاراوكە، كومپيۋتەرلىك كلۋبتار، بانكەت زالدارى، بوۋلينگ كلۋبتارى، مادەني نىساندار، كينوتەاترلار، تەاترلار، كونتسەرت زالدارى، فيلارمونيا مەكەمەلەرى، جابىق جاعاجايلار جانە اكۆاپاركتەر دە قىزمەتىن ۋاقىتشا توقتاتپاق. ال سپورتتىق ءىس- شارالار كورەرمەنسىز عانا وتكىزىلۋى كەرەك. ال پويىزدار ورتاق ۆاگوندارعا ادام الماي قاتىناي الادى. قاۋلىدا وبلىستاعى ءدىني ورىنداردا عيبادات جاساۋ ءۇشىن عيمارات ىشىندە ءار ادامعا 4 شارشى مەتر اۋماق قامتاماسىز ەتىلىپ، ادام سانىن 30-دان اسىرماي، ماسكالىق رەجيمدى ساقتاۋ وتىرىپ رۇقسات بەرىلەتىنى ايتىلعان. «قۇربان ايت» مەرەكەسىن اتاپ ءوتۋ ءىس- شارالارى تەك ونلاين رەجيمدە ىسكە اسىرىلسىن»، - دەپ جازىلعان قاۋلىدا.

قاۋلى 15- شىلدە كۇنى ساعات 00-دەن باستاپ كۇشىنە ەنەدى. قاۋلىنىڭ تولىق ماتىنىمەن مىنا جەردە تانىسۋعا بولادى.

اۆتور: ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى