نوبەل سىيلىعىنىڭ لاۋرەاتى «گاۋھار تاستى» شۆەد تىلىندە سويلەتتى

Gün Publishing House جانە Hertfordshire Press اتتى شۆەد باسپاسى قازاق جازۋشىسىنىڭ شىعارمالارىن «Brännande Sol, Isande Vind, Levande Stäpp» وت ۇرلەگەن كۇن، مۇز بۇرىككەن جەل، جاندى دالا) دەگەن اتپەن اۋدارۋ جۇمىسىن 2019 -جىلى باستاعان بولاتىن.

باسپا ماماندارى اۋدارمانىڭ مازمۇنىمەن بىرگە كىتاپ مۇقاباسىنىڭ كورنەكتى ءارى ساپالى بولۋىنا دا كوپ كۇش سالىنعانىن ايتادى. سونىڭ ارقاسىندا كىتاپ تەك شۆەتسياعا ەمەس، لوندون ارقىلى بۇكىل ەۋرازياداعى شۆەد ءتىلدى وقىرماندارعا تاراتىلماق. جازۋشى، دراماتۋرگ، ق ر مەملەكەتتىك سىيلىعىنىڭ ءبىرىنشى لاۋرەاتى دۋلات يسابەكوۆتىڭ درامالىق شىعارمالارى لوندونداعى ەۋرازيا شىعارماشىلىق گيلدياسىنىڭ قولداۋىمەن قۇرلىقتاعى بىرنەشە ەلدە ساحنالانىپ ءجۇر. 2022 -جىلى بۇل ەلدەردىڭ تىزىمىنە اۋستراليا دا ەنبەكشى.

«Brännande Sol, Isande Vind, Levande Stäpp» كىتابىنا جازۋشىنىڭ «گاۋھار تاس»، «سۇيەكشى»، «دەرمەنە»، «وكپەك جولاۋشى»، «ءبىز سوعىستى كورگەن جوقپىز» سياقتى بەس تانىمال پوۆەسى مەن «قابىلان» جانە «تىنىشتىق كۇزەتشىسى» اتتى اڭگىمەلەرى كىرگەن. بۇل رەتتە «وكپەك جولاۋشى» پوۆەسىنىڭ لوندوندا ساحنالانعانىن ايتا كەتۋ كەرەك.

كىتاپتى شۆەد تىلىنە نوبەل سىيلىعىنىڭ لاۋرەاتى، شۆەد كورولدىك عىلىم اكادەمياسىنىڭ اكادەميگى، امەريكا عىلىم جانە ونەر اكادەمياسىنىڭ مۇشەسى بەنگت سامۋەلسون اۋدارعان. كىتاپتىڭ پرومو- پرەزەنتاسياسى بىلتىر لوندونداعى Oebf 2020 ادەبي فەستيۆالىنىڭ اياسىندا وتكەن بولاتىن. ال رەسمي تۇساۋكەسەرىن بيىل قازاقستاننىڭ ستوكگولمداعى ەلشىلىگىمەن بىرلەسىپ وتكىزۋ جوسپارلانىپ وتىر. شارادا شۆەد اكادەميكتەرى مەن ديپلوماتتارى قاتىسىپ، كىتاپ تۋرالى رەسەنزيالارىن ۇسىنباقشى. كىتاپتىڭ ونلاين نۇسقاسىن Discovery Bookshop رەسمي سايتىنان ساتىپ الۋعا بولادى.

اۆتور: ەسىمجان ناقتىباي

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى