كولسايدا ەكى كۇشىگىمەن بىرگە سەرۋەندەپ جۇرگەن ءىلبىس كوزگە ءتۇستى - ۆيدەو
ەكولوگيا، گەولوگيا جانە تابيعي رەسۋرستار مينيسترلىگىنىڭ مالىمەتىنشە، «كولساي كولدەرى» ۇلتتىق پاركىندەگى فوتوتۇزاققا تاعى دا قار بارىسى تۇسكەن. ۆيدەودان ەكى كۇشىگىمەن بىرگە سەرۋەندەپ جۇرگەن ءىلبىستىڭ انالىعىن كورۋگە بولادى. بۇعان دەيىن دە ساياباقتا ورنالاسقان فوتوتۇزاق «قىزىل كىتاپقا» ەنگەن جىرتقىشتى بىرنەشە رەت تىركەگەن ەدى. پارك اۋماعىندا تەك 16 قار بارىسى بار. جانۋارلاردىڭ سانى تۇراقتى ساقتالىپ تۇر.
ەستەرىڭىزگە سالا كەتەيىك، قار بارىسى (Uncia uncia Schreber، 1775) قازاقستاننىڭ قىزىل كىتابىنا ەنگىزىلگەن. ءبىزدىڭ ەلدە 120-130 قار بارىسى مەكەندەيدى، الەمدە 7 مىڭنان اسپايدى. فوتوتۇزاق - جىرتقىشتاردىڭ سانىن ەسەپكە الۋ مەن باقىلاۋدىڭ زاماناۋي ادىستەرىنىڭ ءبىرى.
