باس ءمۇفتي قۇربان ايت قارساڭىندا كاسىپكەرلەرگە ۇندەۋ جاسادى
«قادىرلى وتانداستار! قۇرمەتتى كاسىپكەرلەر! مۇسىلمان قاۋىمىنىڭ ۇلىق مەيرامى - قۇربان ايتقا ساناۋلى كۇندەر قالدى. ۇلىق كۇندە ءيسى مۇسىلمان بالاسى شىنايى نيەتپەن قۇربان شالىپ، قۇرباندىق ەتىن مۇگەدەكتەر مەن جەتىمدەرگە، كوپبالالى وتباسىلار مەن قارتتارعا تاراتىپ، العىسىن الۋعا تىرىسادى. ادامنىڭ العىسىن الىپ، باتاسىنا بولەنۋ - ساۋاپتى ءىستىڭ ءبىرى. حالقىمىز «العىس العان ارىماس. بوتا العانشا باتا ال» دەيدى ەمەس پە؟ قۇربان ايتتا ورىندالاتىن نەگىزگى ىزگى امالدىڭ ءبىرى - قۇربان شالۋ. ويتكەنى ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «ادام بالاسى قۇربان ايت كۇنى قۇربان شالۋدان وزگە امالىمەن اللاعا جاقىنداعان ەمەس...» دەيدى. دەمەك قۇربان ايت كۇنى اللاعا ۇنامدى ءارى ەڭ سۇيىكتى امال - قۇربان شالۋ. ايت كۇندەرى حالىق تاراپىنان مال ساتىپ الۋعا دەگەن سۇرانىستىڭ ارتا تۇسەتىنى بەلگىلى. وسى رەتتە ەلىمىزدەگى بارشا شارۋا قوجالىقتارىنىڭ قوجايىندارىن ۇلىق مەيرام - قۇربان ايتتىڭ قۇرمەتىنە مال قۇنىن شارىقتاتپاي، حالىققا وڭتايلى باعانى ۇسىنۋعا شاقىرامىن. سونىمەن قاتار، بارشا كاسىپكەرلەردى تۇرعىندار كۇندە تۇتىناتىن الەۋمەتتىك ماڭىزى بار ازىق- تۇلىك باعاسىنا مۇمكىندىگىنشە جەڭىلدىك جاساۋعا ۇندەيمىن» دەلىنگەن ق م د ب تاراتقان باس ءمۇفتيدىڭ ۇندەۋىندە.
قۇربان ايتتىڭ نەگىزگى ءمانى - مۇسىلماندار اراسىندا ءوزارا مەيىرىمدىلىك، جومارتتىق، قايىرىمدىلىق، قاناعات سىندى ادامگەرشىلىك قۇندىلىقتاردى قالىپتاستىرۋ.
«اللانىڭ راقىم نۇرى توگىلەتىن قۇربان ايتتا جۇرتىمىزعا جاقسىلىق جاساپ، كوپشىلىكتىڭ ريزاشىلىعىنا بولەنەيىك. جاراتۋشى يەمىز قۇراندا: «وزدەرىڭ جاقسى كورگەن نارسەنى اللا جولىنا جۇمسامايىنشا يگىلىككە جەتپەيسىڭدەر» («ءال- يمران» سۇرەسى، 92-ايات) دەپ بايانداعان. ساۋاپتار ەسەلەنىپ جازىلاتىن ساتتەردە اللا رازىلىعى ءۇشىن ەلدىڭ جاعدايىن ەسكەرىپ، تاۋار باعالارىنا جەڭىلدىك جاساپ، ءار وتباسىعا قۋانىش پەن مەرەكەلىك كوڭىل كۇي سىيلاۋعا تىرىسايىق. ارداقتى اعايىن! سۇيىكتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «...كىمدە-كىم مۇسىلمان باۋىرىنىڭ قاجەتىنە جاراسا، اللا تاعالا دا ونىڭ قاجەتىن وتەيدى...» دەگەن ءسۇيىنشى حابار جەتكىزگەن. قازاقستان مۇسىلماندارى ءدىني باسقارماسى قۋاڭشىلىقتان زارداپ شەككەن وڭىرلەردەگى شارۋالارعا قولداۋ كورسەتۋ ماقساتىندا «قيىندىقتا ەل بىرگە» اتتى قايىرىمدىلىق اكسياسىن باستادى. اكسيا اياسىندا قىزىلوردا، ماڭعىستاۋ وبلىستارىنا جەم-ءشوپ جونەلتىلەتىن بولادى. وسى يگى ىسكە ۇلەس قوسىپ، سىناقتى ساتتەردى باستان كەشىپ وتىرعان وتانداستارىمىزعا قول ءۇشىن سوزۋعا شاقىرامىن. حاق تاعالا كاسىپتەرىڭىزگە بەرەكە، يگى ىستەرىڭىزگە مول ساۋاپتان جازعاي! ءامين» دەپ تۇيىندەيدى ۇندەۋىن ناۋرىزباي قاجى تاعان ۇلى.
