الماتىدا ينتەرنەت الاياقتىقتىڭ جاڭا ءتۇرى پايدا بولدى
كريمينالدىق پوليتسيانىڭ مالىمەتىنشە، الاياقتىق ءادىسى كەلەسىدەي: ءسىز Instagram بەلسەندى قولدانۋشىسىز. الاياقتار، ادەتتە، ادامداردى جازىلۋشى سانىنا قاراي تاڭدايدى.
«جازىلۋشىسى كوپ كەز كەلگەن ادام «سينيايا گالوچكا» مارتەبەسىن العىسى كەلەدى - مارتەبە پاراقشاڭىزدىڭ جالعان ەمەستىگىن جانە ونى Instagram اكىمشىلىگى راستايتىندىعىن بىلدىرەدى. الاياق سونداي ازاماتتى تاپقاننان كەيىن Instagram-داعى جالعان قولداۋ قىزمەتى پاراقشاسىنان باقىتتى ادام ەكەنىڭىزدى جانە سىزگە «سينيايا گالوچكا» مارتەبەسى بەرىلگەنى تۋرالى تىكەلەي س م س- حابارلاما جىبەرەدى. ول ءۇشىن ءسىز Instagram-نىڭ قۇپيا ءسوزىن ەنگىزۋ ءۇشىن سىلتەمەگە ءوتۋىڭىز كەرەك بولادى. قۇپيا ءسوزدى ەنگىزۋ ارقىلى اۆتوماتتى تۇردە ءوتىنىمىڭىز قابىلدانعانى جانە ءۇش كۇن ىشىندە قارالاتىنى تۋرالى ءماتىن پاراقشاسىنا تۇسەسىز. بىرنەشە ساعاتتان كەيىن پاراقشاڭىزعا كىرۋ مۇمكىندىگىنەن مۇلدەم ايىرىلاسىز. وسىدان كەيىن ۇيالى تەلەفونىڭىزعا نەمەسە ۆاتساپقا پاراقشاڭىزدىڭ بۇزىلعانى جانە بەلگىلى مولشەردە 200-1000 ا ق ش دوللارىن تولەۋ كەرەك دەگەن حابارلامالار كەلە باستايدى»، - دەدى الماتى قالاسى پوليتسيا دەپارتامەنتى باستىعىنىڭ ورىنباسارى رۇستەم ءابدراحمانوۆ.
ونىڭ ايتۋىنشا، وسى تىزبەكتى قولدانۋ ارقىلى ينتەرنەتتەگى الاياقتىق فاكتىسى بويىنشا تەك سوڭعى بىرنەشە كۇندە التى ادام الماتى پوليتسياسىنا شاعىم تۇسىرگەن.
«مۇندا ازاماتتار قابىلداۋى ءتيىس اقپاراتتىق قاۋىپسىزدىك شارالارى ماڭىزدى. ءاردايىم وسىنداي حابارلامالارعا كۇماندانىپ، سىن كوزبەن قاراۋىڭىزدى سۇرايمىز. تۇرعىنداردى ساق بولۋعا جانە قىراعىلىق تانىتۋعا شاقىرامىز»، - دەدى رۇستەم ءابدراحمانوۆ.
اۆتور: الما مۇقانوۆا
