ەلوردادا ايگىلى كورەي سۋرەتشىسىنىڭ كورمەسى اشىلدى
شارانى كورەيا رەسپۋبليكاسى ەلشىلىگىنىڭ كورەي مادەني ورتالىعى مەن ەلباسى كىتاپحاناسى، نۇرسۇلتان نازاربايەۆ قورى بىرگە ۇيىمداستىرىپ وتىر. كورمە اياسىندا الەمگە ايگىلى كورەي سۋرەتشىسى پەك نامدجۋننىڭ مۇراگەرى دەپ سانالاتىن ايگىلى كورەي مەديا ونەرىنىڭ شەبەرى لي ينامنىڭ جۇمىستارى ۇسىنىلعان.
اۆتور بۇل تۋىندىلارى ارقىلى شىعىس ازيا كلاسسيكالىق كەسكىندەمەسىنىڭ ايگىلى كارتينالارىن نەگىزگە الا وتىرىپ، شىعىس جانە باتىس ونەرىنىڭ ۇيلەسىمىن كورسەتكەن. كورمە ەلباسى مۋزەيىنىڭ كوپفۋنكتسيونالدى كورمە زالىندا ءوتىپ جاتىر، ءتورت جاعىنان ۇلكەن مۋلتيمەديالىق LED- ەكراندارمەن جابدىقتالعان.
اۆتور سيفرلىق ونەردىڭ كومەگىمەن شىعىس ازيا مەن باتىستىڭ كەمدجە چونگسون، كيم حوندو، جورج-پەر سەرا، ۆينسەنت ۆان گوگ سياقتى قىلقالام شەبەرلەرىنىڭ كارتينالارىن بىرىكتىرۋ ارقىلى جاڭا مازمۇن اشقان، سونداي-اق تىڭ ستيلدەگى تۋىندى ارقىلى قازاقستان مەن كورەيا ىنتىماعىنىڭ كەلەشەگىن دارىپتەيدى.
50 مينۋتتىق تۋىندى كلاسسيكا مەن زاماناۋي كەسكىندەمەنى ءبىر مۋلتيمەديالىق كونتەنتكە توعىستىرعان.
«مەن پاندەمياعا بايلانىستى اشىلۋ راسىمىنە قاتىسا الماعانىما وتە وكىنەمىن. ءبىراق، سوعان قاراماستان، قازاقستاندا كورەي كلاسسيكالىق كەسكىندەمەسىنىڭ تانىمال كارتينالارى ناسيحاتتالىپ جاتقانى قۋانتادى. وسى كورمەگە ارناپ ءوز تۋىندىلارىمدى «جارىقتىڭ جاندانۋى» تاقىرىبىندا دايىندادىم. سول ارقىلى كورەيا مەن قازاقستان اراسىنداعى ءوزارا قارىم-قاتىناستاردىڭ تاريحي سيپاتىنا جارىق تۇسىرگىم كەلدى»، - دەدى كورمەنىڭ اشىلۋىندا تىكەلەي بايلانىس ارقىلى ءسوز العان لي ينام.
كورەي مادەني ورتالىعى بۇل شارانى قازاقستان تاۋەلسىزدىگىنىڭ 30 جىلدىعى اياسىندا قولعا الىپ وتىر.
«ءبىزدىڭ مادەني ورتالىق قازاقستان تاۋەلسىزدىگىنىڭ 30 جىلدىعى قارساڭىندا قازاقستاندىقتارعا كورەي مەديا ونەرىنىڭ تۋىندىلارىن ۇسىنعانىنا قۋانىشتىمىن. سۋرەتشى ەڭبەكتەرىنىڭ ارقاسىندا كورەيا تۋرالى كوبىرەك ءبىلىپ، ورتالىقتىڭ الداعى ءىس-شارالارىنا دا جۇرتتىڭ قىزىعۋشىلىعى ويانادى دەپ ۇمىتتەنەمىن»، - دەيدى كورەي مادەني ورتالىعىنىڭ ديرەكتورى لي حەران.
كورمە 12-قىركۇيەككە دەيىن جۇمىس ىستەيدى.
