پرەمەر- مينيستر الەۋمەتتىك ماڭىزى بار ازىق- تۇلىك باعاسىن تۇراقتاندىرۋدى تاپسىردى
«قازاقستان ەكونوميكاسى وڭ ءوسىم كورسەتۋدە. وتكەن جىلدىڭ وسىنداي كەزەڭىمەن سالىستىرعاندا بيىلعى بەس اي ىشىندە ءوسىم %1,6 بولدى. ەكونوميكا دامۋىنىڭ نەگىزگى درايۆەرلەرى - وڭدەۋ ونەركاسىبىندە ءوسىم %7,2 پايىز، ماشينا قۇراستىرۋدا %21,1، ونىڭ ىشىندە اۆتوموبيل جاساۋدا %26,4 جانە لوكوموتيۆتەر مەن ۆاگوندار قۇراستىرۋدا ءوسىم %54,9 بولدى. وڭدەۋشى سەكتوردا جوعارى سەرپىن كورسەتكەن سالالار - حيميا ونەركاسىبىندە ءوسىم %9,8، جەڭىل ونەركاسىبىندە %5,5، مەتاللۋرگيادا %2,7، فارماتسيەۆتيكادا %25,7 جانە مۇناي وڭدەۋدە %3,4. قۇرىلىس سەكتورىندا ءوسىم %11,3 پايىز جانە تۇرعىن ءۇيدى پايدالانۋعا بەرۋدە %12,5 - نەمەسە 4,6 ميلليون شارشى مەتر جوعارى ءوسىم قارقىنى قامتاماسىز ەتىلدى. اۋىل شارۋاشىلىعىنداعى ءوسۋ قارقىنى - ورنىقتى، %3,1 قۇراپ وتىر»، - دەپ اتاپ ءوتتى پرەمەر- مينيستر بۇگىنگى ۇكىمەت وتىرىسىندا.
بۇكىل ەكونوميكاداعى نەگىزگى كاپيتالعا ينۆەستيتسيالاردىڭ ءوسۋى، تاۋ- كەن ءوندىرۋدى ەسەپتەمەگەندە، %25,5 قۇرادى. قىزمەت كورسەتۋ سەكتورىندا، اتاپ ايتقاندا، ساۋدا جانە بايلانىس سالاسىندا ەكىنشى اي قاتارىنان وڭ قارقىن بايقالىپ وتىر.
«بيىلعى قاڭتار- مامىر ايلارىنىڭ قورىتىندىسى بويىنشا بارلىق 7 نەگىزگى ماكروكورسەتكىش بويىنشا ماڭعىستاۋ وبلىسى مەن شىمكەنت قالاسىندا ءوسىم بايقالىپ وتىر. 6 نەگىزگى كورسەتكىش بويىنشا جەتى وڭىردە جوعارى قارقىن تىركەلدى. بۇلار - اقمولا، اقتوبە، جامبىل، قاراعاندى، پاۆلودار، الماتى جانە تۇركىستان وبلىستارى. جەتى وڭىردە 5 كورسەتكىش بويىنشا وڭ سەرپىن بار. بۇل - اتىراۋ، شىعىس قازاقستان، قوستاناي، قىزىلوردا، سولتۇستىك قازاقستان وبلىستارى مەن نۇر- سۇلتان، الماتى قالالارى. باتىس قازاقستان وبلىسىندا ەڭ تومەنگى كورسەتكىشتەر بايقالدى»، - دەيدى ا. مامين.
پرەمەر- مينيستر ءوسۋ سەرپىنىن ۇستاپ تۇرۋ ءۇشىن ەكونوميكانى ودان ءارى ءارتاراپتاندىرۋ، ينۆەستيتسيالار تارتۋ جانە جۇمىس ورىندارىن قۇرۋ جۇمىستارىن جالعاستىرۋ قاجەتتىگىن ايتتى.
«سونىمەن قاتار، ينفلياتسيا دەڭگەيىنىڭ ءوسۋى بايقالۋدا. بۇل - ءبىرقاتار تاۋارلار مەن اقىلى قىزمەتتەر باعاسىنىڭ ۇلعايۋىنا بايلانىستى. وڭىرلەر اكىمدىكتەرىنە مەملەكەتتىك ورگاندارمەن بىرگە الەۋمەتتىك ماڭىزى بار ازىق- تۇلىك تاۋارلارىنىڭ باعاسىن تۇراقتاندىرۋ، تاماق ونىمدەرىنىڭ ءوندىرىسىن ىنتالاندىرۋ جانە ولارمەن ىشكى نارىقتى مولىقتىرۋ بويىنشا ناقتى شارالار قابىلداۋدى تاپسىرامىن. باسەكەلەستىكتى قورعاۋ جانە دامىتۋ اگەنتتىگى وڭىرلەر اكىمدىكتەرىمەن بىرگە الەۋمەتتىك ماڭىزى بار ازىق- تۇلىك تاۋارلارىنىڭ باعاسىن نەگىزسىز ءوسۋ فاكتىلەرىنىڭ جولىن كەسۋدى دەر كەزىندە قامتاماسىز ەتسىن» ، - دەپ تاپسىرما بەردى ول. سونىمەن بىرگە، كىرىستەر بويىنشا بيۋدجەتتىڭ اتقارىلۋى بيىلعى جوسپارعا قاتىستى % 101,6 دەڭگەيىندە قالىپتاستى.
«اكىمشىلەرگە اي سايىنعى جوسپارلى يگەرۋدى قامتاماسىز ەتۋدى تاپسىرامىن. التى ايدىڭ قورىتىندىسى بويىنشا ەلدىڭ الەۋمەتتىك- ەكونوميكالىق دامۋ قورىتىندىلارىن مەملەكەت باسشىسى دەڭگەيىندە قاراستىرۋ كوزدەلىپ وتىر. مينيسترلىكتەر مەن اكىمدىكتەرگە جۇمىستى جانداندىرىپ، ۇلتتىق ەكونوميكانىڭ جوسپارلانعان ءوسۋ كورسەتكىشتەرىنە قول جەتكىزۋ بويىنشا مەملەكەت باسشىسى بەلگىلەپ بەرگەن مىندەتتەردى ىسكە اسىرۋدا ءتيىستى شارالار قابىلداۋدى تاپسىرامىن»، - دەدى اسقار مامين.
