قازاقستاندا كارتوپتىڭ قىمباتتاۋىنا نە ىقپال ەتتى - مينيستر ەسەبى
«كارتوپ بويىنشا اۋىل شارۋاشىلىعى مينيسترلىگىنىڭ مالىمەتتەرىنە سايكەس وتاندىق ءوندىرىس ىشكى تۇتىنۋدى %108 تەن استام قامتاماسىز ەتەدى. سونىمەن قاتار، كارتوپتىڭ تاۋارلىق ءوندىرىسىنىڭ كولەمى بار بولعانى 2 ميلليون توننانى نەمەسە جالپى ءتۇسىمنىڭ %47 ءتىن قۇرايدى. قالعان كولەمى تاۋار اينالىمىندا جۇيەلى تۇردە قاتىسپايدى. ول حالىقتىڭ جەكە قوسالقى شارۋاشىلىقتارىندا وندىرىلەدى»، - دەدى ساۋدا ءمينيسترى بۇگىنگى ۇكىمەت وتىرىسىندا.
ونىڭ ايتۋىنشا، وتكەن جىلى ەكسپورت 360 مىڭ توننا كولەمىندە رەكوردقا جەتكەن. وسىلايشا، كارتوپ ەكسپورتىنىڭ ۇلەسى %19 ءتى قۇرايدى، بۇل نارىق تاپشىلىعىنا اكەلەدى.
«وسىعان وراي، ماۋسىمارالىق ۋاقىتتا كارتوپتى يمپورتتاۋ قاجەتتىلىگى تۋىندايدى. بۇل جاعداي جىلدان جىلعا قايتالانىپ كەلەدى. ءبىراق وسى ماسەلەنى باسقارىپ جۇيەلى شەشىمدەردى تابۋعا اۋىل شارۋاشىلىعى مينيسترلىگى شاقىرعانىمەن جەرگىلىكتى اتقارۋشى ورگاندار اتالعان پروبلەمانى جويۋ بويىنشا ءتيىستى شارالار قابىلدامايدى. وتكەن جىلى كارتوپ ەكسپورتىنا تىيىم سالۋ ارقىلى عانا باعا تۇراقتاندىرىلدى. بيىل تومەن باعامەن ەكسپورتتالعان (69 مىڭ توننا) وتاندىق ءونىم قورلاردىڭ 3 ەسە قىسقارۋىنا (903 مىڭ توننادان 330 مىڭ تونناعا دەيىن) اسەر ەتكەن»، - دەيدى باقىت سۇلتانوۆ.
اتالعان كەزەڭدەگى تەڭگەرىمسىزدىكتى تولتىرۋ ءۇشىن يران مەن پاكىستاننان 28 مىڭ توننا قىمبات يمپورتتىق كارتوپ ساتىپ الىندى. بۇل وتاندىق كارتوپقا قاراعاندا ءۇش ەسە قىمبات.
«جالپى، بيىلعى 4 ايدا كارتوپ يمپورتى وتكەن جىلدىڭ سايكەس كەزەڭىمەن سالىستىرعاندا 67 ەسە ءوستى، ال جىل باسىنان بەرى يمپورت باعاسى %47 كە جوعارىلادى. بۇل رەتتە اكىمدىكتەر بارلىق قاجەتتى تەتىكتەرى بولسا دا، حالىقتى قامتاماسىز ەتۋ ءۇشىن ىشكى نارىقتا كارتوپتى ۇستاي المادى. اتاپ ايتقاندا، سۋبسيديالاۋ كەزىندە وندىرۋشىلەرگە «قارسى مىندەتتەمەلەر» قويىلماعان. وڭىرلىك تۇراقتاندىرۋ قورلارىنا كارتوپ جەتكىلىكتى كولەمدە ساتىپ الىنبادى، سونداي- اق فورۆاردتىق ساتىپ الۋ جانە «اينالىم سحەماسى» سياقتى نارىقتىق تەتىكتەر تولىق پايدالانىلمادى. ايماقتاردىڭ تۇراقتاندىرۋ قورلارىندا قازىرگى ۋاقىتتا كارتوپ قورى ءىس جۇزىندە جوق»، - دەدى باقىت سۇلتانوۆ.
ساۋدا ءمينيسترى ۇكىمەت باسشىسىنان قىسقا مەرزىمدە اۋىل شارۋاشىلىعى مينيسترلىگىنە ساۋدا جانە ينتەگراتسيا مينيسترلىگىمەن بىرلەسىپ، ازىق- تۇلىك تاۋارلارىن ءوندىرۋ مەن تۇتىنۋدىڭ بولجامدى تەڭگەرىمىن ازىرلەۋ تۋرالى تاپسىرما بەرۋدى سۇرادى.
«بۇل باعانىڭ ءوسۋ تاۋەكەلدەرىن دەر كەزىندە انىقتاۋعا جانە باعانى تۇراقتاندىرۋ بويىنشا الدىن الۋ شارالارىن ۋاقىتىلى ەنگىزۋگە مۇمكىندىك بەرەدى. سونداي- اق، قازىردىڭ وزىندە جەرگىلىكتى اتقارۋشى ورگاندار ا ش م جەتەكشىلىگىمەن اۋىل شارۋاشىلىعى وندىرۋشىلەرىن سۋبسيديالاۋ شەڭبەرىندە ىشكى نارىقتى ءبىرىنشى كەزەكتە ونىممەن قامتاماسىز ەتۋ بويىنشا قارسى مىندەتتەمەلەر قويۋى قاجەت»، - دەدى باقىت سۇلتانوۆ.
