ىستىقتان قالاي ساقتانامىز؟

ەگەر اۋا تەمپەراتۋراسى نەبارى 1 گرادۋسقا كوتەرىلسە، ونى ادام تەرىسىندەگى تەرمورەتسەپتورلار، تەرەڭ تكاندەر جانە ورگاندار بىردەن سەزەدى. اينالاداعى تەمپەراتۋرا دەنە تەمپەراتۋراسىنان (36,5-37,5) جوعارى بولسا، ءبىز سالقىنداۋ ءۇشىن تەرلەي باستايمىز. سالدارىنان كوپ سۇيىق جوعالتامىز. ادام اعزاسىنا كۇن وتەدى. كۇن وتۋدەن كوبىنە قارت ادامدار زارداپ شەگەدى ەكەن. ال اۋا تەمپەراتۋراسى 40 گرادۋستان اسقاندا، دالادا دا، كەڭسەدە دە جۇمىس ىستەۋ وتە قيىن بولادى.

ماسساگەت پورتالى ىستىقتان قورعانۋعا ارنالعان بىرنەشە كەڭەس ۇسىنادى.

1. جەڭىل كيىنىڭىز. تابيعي تالشىقتاردان جاسالعان، اشىق ءتۇستى، اۋا وتكىزەتىن كيىمدەردى تاڭداڭىز؛

2. شلياپاسىز جانە كوزىلدىرىكسىز جۇمىسقا بارماڭىز. تەرىڭىزدى كۇننەن قورعايتىن كرەممەن «دوستاسىڭىز»؛

3. تەرىگە مايلى كرەمدەر مەن شامادان تىس كوسمەتيكا جاعۋدان اۋلاق بولىڭىز؛

4. مۇمكىندىگىنشە گازسىز سۋ ءىشىڭىز، وعان ليمون نەمەسە جالبىز قوسۋعا بولادى. كوك شاي، كومپوتتار دا ىستىقتا ىشۋگە بولاتىن سۋسىندار. كوفە مەن الكوگولدەن اۋلاق بولىڭىز؛

5. اس قورىتۋ ءۇشىن جەڭىل تاماق ءىشىڭىز. جاڭا پىسكەن جەمىستەر، بالمۇزداق جانە ءتۇرلى كوكونىستەر - جاز ماۋسىمى ءۇشىن وتە قولايلى تاعام؛

6. ەڭ دۇرىسى دەمالىسقا بارۋ جانە تاۋدا دەمالۋ؛

كوشەدەگى جۇمىسشىلار ىستىقتان قالاي ساقتانۋ كەرەك؟

كۇنى بويى قۇرىلىسشىلار، جۇك تاسۋشىلار، تراكتور جۇرگىزۋشىلەرى، پارك كۇزەتشىلەرى جانە كوشە قىزمەتكەرلەرى كەڭسەدە وتىرىپ جۇمىس ىستەيتىن قىزمەتكەرلەردەن گورى كۇن نۇرىمەن كوبىرەك بەتپە-بەت كەلەدى. ونىڭ ۇستىنە، ولاردىڭ كوپشىلىگى قالىڭ فورمادا جۇرەدى.

1. كوشەدە كوپ جۇرەتىن جۇمىسشىلار ىشۋگە دە، جۋىنۋعا دا مۇمكىندىگىنشە كوبىرەك سۋ الۋى كەرەك؛

2. لاس الاقانمەن نەمەسە كيىمىڭىزدىڭ جەڭىمەن بەتىڭىزدى سۇرتپەڭىز. بۇل جاعداي ءۇشىن ءارقاشان قالتاڭىزدا ىلعال سۇلگى ۇستاڭىز؛

3. ءۇزىلىس جاساڭىز. جۇمىستا ءار ساعات سايىن 10 مينۋت دەمالىڭىز. نەمەسە ەكى ساعاتتىق جۇمىستان كەيىن 15 مينۋتتان دەمالۋ كەرەك؛

4. كولەڭكەدە جۇمىس ىستەۋگە تىرىسىڭىز. بۇل مۇمكىن بولماسا - اندا-ساندا كولەڭكەدە دەمالىڭىز؛

5. ەگەر ءسىزدىڭ جۇمىس ورنىڭىز اۆتوكولىك سالونى بولسا - ونىڭ تەرەزەلەرىنە كۇنقاعار ورناتىڭىز. بۇل ءادىس اۆتوموبيل ىشىندەگى تەمپەراتۋرانى 5-7 گرادۋسقا تومەندەتەدى؛

كەڭسەنى ىستىقتان قالاي قورعاۋعا بولادى؟

كەڭسەدە جۇمىس ىستەۋ وڭايىراق. ءبىراق كەڭسەدە كونديتسيونەر بولماسا قيىن. جەلدەتكىشتىڭ ءوزىن ۇزاق ۋاقىت قوسۋعا بولمايدى. سالقىن جەل دەنساۋلىعىڭىزعا ايتارلىقتاي اسەر ەتەدى.

1. بارلىق ماڭىزدى جۇمىستار مەن كەزدەسۋلەردى كۇننىڭ ءبىرىنشى جارتىسىندا - كۇن ءالى كوتەرىلمەگەن كەزدە جوسپارلاڭىز؛

2. جۇمىس ۇستەلىنە ىدىسقا سۋ تولتىرىپ قويىڭىز. بۋلانعان سۋ اۋانى دا سالقىنداتادى؛

3. سۋ بۇرىككىش ساتىپ الىڭىز جانە وعان سۋىق سۋ قۇيىڭىز؛

4. قولىڭىزدى ءجيى جۋىڭىز. بۇل سۋىق سۋمەن شايىنۋعا تاعى ءبىر سىلتاۋ؛

6. تەرەزەنى كۇننەن قورعايتىن فولگامەن جابىڭىز؛

7. بولمەنى ءجيى جەلدەتىڭىز؛

8. بولمەدەگى قاراپايىم شامدى جارىقديودتى شامدارمەن اۋىستىرىڭىز. سەبەبى قاراپايىم شام جىلۋدى كوپ بولەدى؛

9. جازدىڭ ىستىق كۇندەرىندە جۇمىسقا تاڭەرتەڭ ەرتە جەتىڭىز. ول ءۇشىن سۋىق سۋ الىپ الۋدى ۇمىتپاڭىز. اسىرەسە، بۇل قوعامدىق كولىكتەردە ءومىرىڭىزدى ساقتاۋعا كومەكتەسەدى؛

ەگەر ءسىز ىستىقتا جۇمىس ىستەگەندىكتەن السىزدىك، ەنتىگۋ، باس اينالۋ، باس اۋرۋ، كوز قاراۋىتۋ، جۇرەك سوعىسىنىڭ جىلدامدىعىن سەزىنسەڭىز، اباي بولىڭىز، بۇل كۇن وتكەننىڭ ايقىن بەلگىلەرى. العاشقى بەلگىلەر پايدا بولعان كەزدە دارىگەرگە كورىنۋدى ۇمىتپاڭىز.

massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى