شاحماتشىلارىمىزعا قانداي قولداۋ كورسەتىپ وتىرمىز؟
ورتالىق كوممۋنيكاتسيالار قىزمەتىندە وتكەن بريفينگىدە سپورت جانە دەنە شىنىقتىرۋ ىستەرى كوميتەتى مەن قازاقستان شاحمات فەدەراتسياسىنىڭ وكىلدەرىنە وسىنداي سۇراق قويىلدى، دەپ حابارلايدى قازاقپارات ءتىلشىسى.
«جانسايا - ايەلدەر شاحماتىنىڭ جەتەكشى گروسسمەيستەرلەرىنىڭ ءبىرى. مەملەكەت تاراپىنان تەك جانساياعا عانا ەمەس، ەرلەر، ايەلدەر، بالالار مەن جاس وسپىرىمدەر قۇرامالارىنا ناقتى قولداۋ كورسەتىلەدى. سپورتشىلارعا تولەنەتىن ستيپەنديالار بار. فەدەراتسيا تاراپىنان سپورتشىلارىمىزدى قازاقستاننىڭ جەتەكشى شاحماتشىلارىمەن بىرگە وقۋ-جاتتىعۋ جيىندارىنان ءوتۋ ءۇشىن حالىقارالىق جارىستارعا جىبەرۋ ءۇشىن قاراجات ىزدەستىرىپ وتىرامىز»، - دەدى قازاقستان شاحمات فەدەراتسياسىنىڭ ديرەكتورى، حالىقارالىق گروسسمەيستەر ءانۋار ەسماعامبەتوۆ.
سپورت جانە دەنە شىنىقتىرۋ ىستەرى كوميتەتىنىڭ ءتوراعاسى سەرىك ساپيەۆ بولسا، مادەنيەت جانە سپورت مينيسترلىگى تاراپىنان شاحمات فەدەراتسياسىنا ناقتى قولداۋ قاراستىرىلعانىن اتادى.
ونىڭ ايتۋىنشا، بيىل فەدەراتسيا جۇمىسىن قوداۋ ءۇشىن بيۋجەتتەن 32 ميلليون تەڭگە ءبولۋ جوسپارلانعان.
بۇل - جىل سايىن شاحماتتى قولداۋعا بولىنەتىن قاراجاتتىڭ ناقتى كولەمى. بۇعان دەيىن حابارلاعانىمىزداي، مەملەكەت باسشىسى قاسىم-جومارت توقايەۆ جانسايا ابدىمالىكتى فيدە گران-پريىندەگى جەڭىسىمەن قۇتتىقتاعان بولاتىن.
ەسكە سالساق، اتالمىش تۋرنيردەگى جەتىستىگى ءۇشىن وتانداسىمىز ەرلەر اراسىنداعى حالىقارالىق گروسسمەيستەر اتاندى.
