تۇركيا قارا تەڭىزدەن تاعى ءبىر ءىرى گاز كەن ورنىن تاپتى

بۇل تۋرالى ەل پرەزيدەنتى رەجەپ تايىپ ەردوعان ءمالىم ەتتى، دەپ حابارلايدى قازاقپارات انادولى اقپارات اگەنتتىگىنە سىلتەمە جاساپ.

«ءبىزدىڭ «فاتيح» بۇرعىلاۋ كەمەسى «ساكاريا» ۋچاسكەسىنىڭ اماسرا-1 ۇڭعىماسىندا كولەمى 135 ميلليارد تەكشە مەتردى قۇرايتىن تابيعي گاز جاڭا كەن ورنىن انىقتادى»، - دەدى تۇركيا ەلىنىڭ پرەزيدەنتى رەجەپ تايىپ ەردوعان.

مەملەكەت باسشىسى تۇركيانىڭ قارا تەڭىزدە انىقتاعان تابيعي گاز قورىنىڭ جالپى كولەمى وسىمەن 540 ميلليارد تەكشە مەترگە جەتكەنىن اتاپ ءوتتى.

ول اماسرا-1 ۇڭعىماسى اۋدانىنداعى بۇرعىلاۋ جۇمىستارى جالعاسىپ وتىرعانىن جانە ەل بيلىگى بۇل ايماقتان «جاڭا جاقسى جاڭالىقتاردى» كۇتىپ وتىرعانىن مالىمدەدى.

پرەزيدەنت ەردوعان سونداي-اق تابيعي گازدى تەڭىزدەن قۇرلىققا ءۇش كەزەڭمەن جەتكىزۋ جوسپارلانىپ وتىرعانىن اتاپ ءوتتى.

ونىڭ ايتۋىنشا، ءبىرىنشى كەزەڭدە تابيعي گازدى تەڭىز تۇبىنەن ءوندىرۋ جۇيەلەرى ورناتىلادى، ال ەكىنشى كەزەڭدە تابيعي گازدى قۇرلىقتا وڭدەپ، ونى پايدالانۋعا دايىندايتىن قۇرىلعىنى ىسكە قوسۋ جوسپارلانعان.

«ءۇشىنشى كەزەڭ - بۇل تەڭىزدەگى جۇيە مەن قۇرلىقتاعى نىسان اراسىنداعى بايلانىستى قامتاماسىز ەتەتىن قۇبىر جەلىسى»، - دەپ باياندادى تۇركيا پرەزيدەنتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى