ەندى بار ءۇمىت وليمپيادادا - بوكستان قازاقستان ۇلتتىق قۇراماسىنىڭ باس باپكەرى عالىم كەنجەبايەۆ
بىرىككەن اراب امىرلىكتەرىندە وتكەن سارى قۇرىلىق دوداسىندا وتاندىق بىلعارى قولعاپ شەبەرلەرى التىنسىز قالعانى ءمالىم.
وسى ورايدا قۇراما باس باپكەرى عالىمبەك كەنجەبايەۆ Vesti.kz تىلشىسىنە بەرگەن سۇحباتىندا وتكەن جارىسقا كوڭىلى تولمايتىنىن ايتتى.
- عالىمبەك قالي ۇلى، ازيا چەمپيوناتىندا فينالعا جولداما العان بوكسشىلاردىڭ بىردە بىرەۋى التىنعا ىلىگە المادى. وسى ورايدا پىكىرىڭىزدى بىلدىرە كەتسەڭىز.
- ارينە ازيا چەمپيوناتىندا التىن الماعان سوڭ كوڭىلىم تولمايدى. ەندى بۇيىرسا وليمپيادا ويىندارىنا دايىندالامىز. جىبەرگەن قاتەلىكتەرىمىزدى تۇزەيمىز. توكيوعا دەيىن الماتىدا ەكى رەت وقۋ-جاتتىعۋ جيىندارىن وتكىزىپ، ارتىنشا كۇنشىعىس ەلىنە اتتانامىز. قازاقستان بوكس فەدەراتسياسىنا العىس ايتقىم كەلەدى. كورسەتكەن ناتيجەمىزگە قاراماستان باپكەرلەر مەن جىگىتتەرگە قولداۋ كورسەتتى. موتيۆاتسيا بەردى. سىزدەرگە سەنەمىز دەگەن جىلى لەبىزدەرىن ءبىلدىرىپ جاتتى. سونىمەن قاتار ۇ و ك (ۇلتتىق وليمپيادا كوميتەتى)، سپورت مينيسترلىگىنىڭ وكىلدەرى، سەرىك ساپيەۆ، باقتيار ارتايەۆ سىندى بوكس ارداگەرلەرى جىگىتتەردىڭ قاسىنان تابىلىپ، ۇلكەن جەڭىستەرى ءالى الدا ەكەنىن ايتتى.
- بوكس ماماندارىنىڭ پىكىرىنشە قورجىندا كەم دەگەندە ەكى التىن بولۋى ءتيىس ەدى دەپ جاتىر. وسى ورايدا ۇلتتىق قۇرامانىڭ باس باپكەرى رەتىندە قانداي باعا بەرەسىز؟
- وكىنىشكە قاراي بۇيىرعانى وسى بولدى. التىن الۋ ءۇشىن ءالى دە كوپ جۇمىس ىستەۋ كەرەك. جىگىتتەرىمىز اسىرەسە فيزيكالىق الەۋەتىن ارتتىرۋى ءتيىس. بۇيىرسا ۇلكەن جەڭىستەرىمىز ءالى الدا.
ەسكە سالايىق، قازاقستان ۇلتتىق قۇراماسى ب ا ءا وتكەن ازيا بىرىنشىلىگىندە 5 كۇمىس، 1 قولا جۇلدە يەلەنىپ جالپى كوماندالىق ەسەپتە ءتورتىنشى ورىنعا تابان تىرەدى.
ولاردىڭ اراسىندا 49 كەلىگە دەيىنگىلەر دانيال ءسابيت، 69 كەلىدە ابىلايحان ءجۇسىپوۆ، 75 كەلى سالماق دارەجەسىندە ءابىلحان امانقۇل، 91 كەلىدە ۆاسيلي لەۆيت، 91 كەلىدەن جوعارى سالماقتا قامشىبەك قوڭقابايەۆ كۇمىسپەن كۇپتەلسە، ساكەن بيبوسىنوۆ 52 كەلى سالماقتا قولانى قاناعات تۇتتى.
5 التىن، 1 كۇمىس جانە 3 قولا ەنشىلەگەن كورشىلەس وزبەك كومانداسى جالپى ەسەپتە كوش باستادى.
