دارىگەر ۆاكسينا ارقىلى چيپ سالۋ جانە بەدەۋلىككە ۇشىراۋ جايلى ميفتەرگە تۇسىنىك بەردى
«1795 -جىلى لوندوندا دوكتور دجەننەردىڭ ادامداردى شەشەككە قارسى ەگۋ ناۋقانى باستالعانىن ەسكە سالعىم كەلەدى. ەل اراسىندا ءمۇيىزى وسكەن ادامداردىڭ سۋرەتى شىققان باسىلىمدار تاراعان بولاتىن. تاعى ءبىر باسىلىمداردا ۆاكسينادان كەيىن ادامنىڭ ءبىر قۇلاعى ءتۇسىپ، ءۇشىنشى كوزى پايدا بولاتىنى تۋرالى اقپاراتتار شىقتى. چيپتەۋ تۋرالى اڭىز دا سول توپتاماعا جاتادى، سول دوكتور دجەننەردەن قالعان «وپەرانىڭ» جالعاسى»، - دەدى رافايل روزەنسون دەنساۋلىق ساقتاۋ مينيسترلىگى ۇيىمداستىرعان ونلاين دارىستە.
ساراپشى ءار دوزاعا چيپ سالۋدىڭ شىعىنىن ەسەپتەۋدىڭ ءوزى قيىن دەگەن ءۋاج ايتتى.
«رەسەيدە ۆاكسيناتسيا تامىز ايىندا باستالدى. مەنىڭ ويىمشا، ۆاكسيناعا قارسى شىعىپ جۇرگەندەر ۆاكسينا العانداردىڭ ىشىنەن ءۇشىنشى كوز پايدا بولعان نەمەسە سول قۇلاعى ءتۇسىپ قالعان ءبىر دە ءبىر ادامدى كورسەتە المايدى. بۇل - قاراپايىم ۆاكسينا. ءبىز گەپاتيتكە، باسقا دا قالىڭ ينفەكسياعا قارسى ەكپە الامىز. ۆاكسينانىڭ ءبىر دوزاسىنىڭ قۇنى 10-15 دوللار دەسەك، بۇل سوماعا ەشكىم ونى چيپپەن بايىتا المايدى. بۇگىندە الەم بويىنشا ميللياردتاعان ادام ۆاكسينانىڭ العاشقى دوزاسىن الدى. سونىڭ ءبارىن چيپپەن بايىتۋعا ءتىپتى بيلل گەيتستىڭ دە اقشاسى جەتپەس ەدى. بۇل - تولىق نونسەنس»، - دەدى يممۋنولوگ.
دارىگەر ۆاكسينا مەن بەدەۋلىكتىڭ قاتىسى تۋرالى دا ايتتى.
«الەم حالقىنىڭ %90-95 ءتۇرلى ۆاكسينا الىپ وتىر. ءبىراق سودان جەر شارىنداعى ادامداردىڭ سانى ازايىپ جاتىر ما؟ كەرىسىنشە كوبەيگەن ۇستىنە كوبەيىپ جاتىرمىز. مەنىڭ بالا كەزىمدە جەر بەتىندە 3 ميلليارد ادام بار بولاتىن. قازىر - 8 ميلليارد. ۆاكسينا توڭىرەگىندەگى داۋ- دامايعا قاراماستان كوبەيىپ جاتىرمىز»، - دەدى رافايل روزەنسون.
