قازاقستاندا كاسىپكەرلەرگە ارنالعان ءموبيلدى قوسىمشا پايدا بولادى
پرەمەر- ءمينيستردىڭ ءبىرىنشى ورىنباسارى ءاليحان سمايىلوۆتىڭ توراعالىعىمەن وتكەن كەڭەس «e -Salyq-Business ءموبيلدى قوسىمشاسىن ەنگىزۋ» تاقىرىبىنا ارنالدى. ءموبيلدى قوسىمشا ونلاين رەجيمدە جەكە كاسىپكەر رەتىندە تىركەلۋگە، سالىق رەجيمىن تاڭداۋعا نەمەسە وزگەرتۋگە، چەك بەرۋگە، سالىق ەسەپتىلىگىن قالىپتاستىرۋعا/جىبەرۋگە، سالىق تولەۋگە، حابارلاما/انىقتاما الۋعا، تولەمدەردى باسقارۋعا جانە مەملەكەتتىك كىرىستەر ورگاندارىنان بەلگىلى ءبىر قىزمەتتەردى الۋعا مۇمكىندىك بەرەدى.
ازىرلەۋشىلەر سالىقتار مەن الەۋمەتتىك تولەمدەردى ەسەپتەۋدى، سالىق ەسەپتىلىگىن تولتىرۋ مەن ۇسىنۋدى، كىرىستەر مەن سالىقتاردىڭ ەسەبىن جۇرگىزۋدى اۆتوماتتاندىردى. «e - Salyq-Business» - تى پيلوتتىق تۇردە ىسكە قوسۋ وسى جىلدىڭ شىلدە ايىنا جوسپارلانعان.
ءبىرىنشى كەزەڭدە قولدانۋشىلار سانى شامامەن 100 مىڭ ادامدى قۇرايدى دەپ كۇتىلۋدە. ءا. سمايىلوۆ ادامداردىڭ كاسىپكەرلىكپەن اينالىسۋى ءۇشىن قولايلى جاعداي جاساۋدىڭ ماڭىزدىلىعىن، ونىڭ ىشىندە سالىق مىندەتتەمەلەرىن ورىنداۋ مەيىلىنشە جەڭىلدەتۋ قاجەت ەكەنىن اتاپ ءوتتى. پرەمەر- ءمينيستردىڭ ءبىرىنشى ورىنباسارى اتالعان باعىتتاعى جۇمىستى كۇشەيتۋدى تاپسىردى.
