دۇنيەجۇزىلىك دەنساۋلىق ساقتاۋ ۇيىمى قازاقستاننىڭ كوروناۆيرۋسپەن كۇرەستەگى ەڭبەگىن جوعارى باعالادى
دۇنيەجۇزىلىك دەنساۋلىق ساقتاۋ ۇيىمى باس ديرەكتورى تەدروس ادحانوم گەبرەيەسۋستىڭ ايتۋىنشا، قىركۇيەك ايىنا قاراي جەر شارىنداعى حالىقتىڭ 10 پايىزىنا ەكپە ەگىلىپ، جىل سوڭىنا دەيىن بۇل كورسەتكىش 30 پايىزعا جەتۋى كەرەك. پرەزيدەنت ەلىمىزگە ناقتى كورسەتكەن قولداۋى، ياعني پاندەميانىڭ العاشقى ايلارىندا قورعانىش قۇرالدارى مەن مەديتسينالىق جابدىقتاردى جەتكىزىپ بەرگەنى ءۇشىن دۇنيەجۇزىلىك دەنساۋلىق ساقتاۋ ۇيىمىنا ريزاشىلىق ءبىلدىردى.
قاسىم-جومارت توقايەۆ تەدروس ادحانوم گەبرەيەسۋسكە قازاقستاندا كوروناۆيرۋسپەن كۇرەسۋ ءۇشىن قابىلدانىپ جاتقان شارالار جونىندە مالىمەت بەردى. تەدروس ادحانوم گەبرەيەسۋس قاسىم-جومارت توقايەۆتىڭ پاندەمياعا قارسى كۇرەستەگى ەڭبەگىنە جوعارى باعا بەردى.
تاراپتار العاشقى مەديتسينالىق-سانيتارلىق كومەك قىزمەتىنىڭ دامۋ پەرسپەكتيۆالارىن، اتاپ ايتقاندا، 2018 -جىلى قابىلدانعان استانا دەكلاراتسياسىن ىلگەرىلەتۋ ماسەلەسىن قوزعادى. وسى ورايدا مەملەكەت باسشىسى قازاقستاننىڭ باستاماسى بويىنشا ازىرلەنەتىن العاشقى مەديتسينالىق- سانيتارلىق كومەك تۋرالى ساياسي رەزوليۋتسيانى قولداۋعا شاقىردى. اتالعان قۇجات 2022 -جىلى وتەتىن بۇۇ باس اسسامبلەياسىنىڭ كەزەكتى سەسسياسىندا قابىلدانۋى مۇمكىن.
رەزوليۋتسيا جوباسىندا استانا دەكلاراتسياسىنىڭ مىندەتتەرى مەن العاشقى مەديتسينالىق- سانيتارلىق كومەك مەحانيزمدەرى قامتىلعان. قاسىم-جومارت توقايەۆ تەدروس ادحانوم گەبرەيەسۋسقا «One Health» باعدارلاماسى اياسىندا دايىندالعان ورتالىق ازيانىڭ الەۋەتىن ارتتىرۋ جونىندەگى قازاقستاننىڭ پيلوتتىق جوباسىن ۇسىندى. بۇل جوبا اۋرۋ مەن بيوقاۋىپسىزدىكتى باقىلاۋدىڭ وڭىرلىك ورتالىعىن قۇرۋدى ماقسات ەتەدى.
ەسكە سالا كەتەيىك، بۇگىن قاسىم-جومارت توقايەۆ دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادحانوم گەبرەيەسۋسپەن كەزدەستى. دۇنيەجۇزىلىك دەنساۋلىق ساقتاۋ ۇيىمىنىڭ باسشىسى قازاقستاندا 2 ميلليونعا جۋىق ادامعا ۆاكسينا سالىنعانىن وتە جاقسى كورسەتكىش دەپ اتادى.
