مەكتەپتەر قايتا اشىلسىن دەسەڭىزدەر ۆاكسينا الىڭىزدار - ايماعامبەتوۆ مۇعالىمدەرگە ۇندەۋ جاسادى
«ۆاكسيناعا قاتىستى ءارتۇرلى الىپ- قاشپا سوزدەر بار. ونى بىلەمىز. بىرەۋ بىلاي دەيدى، ەكىنشىسى بىلاي دەيدى. زاڭ بويىنشا ۆاكسينا الۋ - ءار ادامنىڭ ءوز ەركى. ءوزى شەشىم قابىلدايدى. ءبىراق، مەكتەپتەردى اشامىز، ءداستۇرلى فورماتقا كوشەمىز دەسەك، جالپى مەكتەپتە جۇمىس ىستەپ، ارى قاراي ءتيىستى، قاجەتتى ساعاتتارىمىزدى الامىز دەسەك، ارينە ۆاكسينا الماساق بولمايدى. ويتكەنى، ۆاكسينا الۋ - ەڭ الدىمەن ءوزىڭدى، ەكىنشىدەن - جاقىندارىڭىزدى قورعاۋ. ۇشىنشىدەن، بالالاردى قورعاۋدىڭ بىردەن- ءبىر كەپىلى»، - دەدى مينيستر رەسپۋبليكالىق پەداگوگيكالىق كەڭەستە. سونىمەن قاتار ول ءوزىنىڭ جانە ارىپتەستەرىنىڭ بارلىعى قازاقستاندىق جانە وزگە دە ۆاكسينالاردى العانىن اتاپ ءوتتى.
«سوندىقتان سىزدەرگە ۇندەۋ جاسايمىز. كوزدەرىڭىز اشىق قوي. ءبىلىم سالاسىندا ىستەيتىن ارىپتەستەرىمىز ۆاكسينانىڭ نە ەكەنىن ءبىلىپ، ادامزاتتىڭ ويلاپ تاپقان ەڭ ۇلكەن جاقسى شەشىمدەرىنىڭ ءبىرى ەكەندىگىن بىلە تۇرىپ، ۆاكسينا الماساق، وندا كىم الادى؟ ءبىز - اعارتۋشى سالامىز. باسقالارعا «ۆاكسينا الىڭدار، الىپ- قاشپا سوزدەر وتىرىك، سەنبەڭىزدەر» دەپ ايتۋىمىز كەرەك. سوندىقتان وسى ۆاكسينانى بەلسەندى الۋلارىڭىزدى سۇرايمىز»، - دەگەن اسحات ايماعامبەتوۆ كەيبىر مۇعالىمدەردىڭ دەنساۋلىعىنا، مەديتسينالىق كورسەتىلىمگە بايلانىستى ۆاكسينا الماۋى مۇمكىن ەكەنىن دە ەسكەرتىپ ءوتتى. سونىمەن قاتار ول كەلەسى جاڭا وقۋ جىلىندا مەكتەپتەردىڭ ءداستۇرلى فورماتتا جۇمىس ىستەۋى ءۇشىن مۇعالىمدەردىڭ باسىم بولىگى ۆاكسينا الۋى كەرەكتىگىن ايتتى.
«ەندىگى جىلى مەكتەپ اشىلماسا، بارلىق ساعاتتاردى ساقتاپ قالىپ، بيىلعىداي وتىرا بەرۋگە مۇمكىندىك بولا ما، بولماي ما دەگەن دە سۇراق تۋىندايدى»، - دەدى ول.
