پرەزيدەنت: قازاقستان - الەمدە ەڭ كوپ ەنەرگيا پايدالاناتىن ەلدەردىڭ ءبىرى
ق ر پرەزيدەنتى قاسىم-جومارت توقايەۆ ەلەكتر ەنەرگەتيكاسى سالاسىن دامىتۋ ماسەلەلەرى جونىندە كەڭەستە وسىلاي ءمالىم ەتتى، دەپ حابارلايدى قازاقپارات.
جيىندى اشقان مەملەكەت باسشىسى ەلىمىزدىڭ ەلەكتر ەنەرگەتيكا سالاسىن دامىتۋدىڭ ماڭىزدىلىعىن اتاپ ءوتتى. بۇگىندە ەنەرگەتيكانىڭ قازاقستان ەكونوميكاسىنداعى ءرولى زور.
«ەنەرگەتيكالىق قاۋىپسىزدىكتى قامتاماسىز ەتۋ - باستى مىندەتتىڭ ءبىرى. قازاقستاندا ەنەرگيانى تۇتىنۋ قارقىنى جىلدان جىلعا ارتىپ كەلەدى. ءبىراق ىسكە قوسىلىپ جاتقان جاڭا قۋات كوزدەرى وعان ساي ەمەس. سۇرانىستان ارتىق وندىرىلگەن ەلەكتر قۋاتى تاياۋ ارادا سارقىلۋى مۇمكىن. شىن مانىندە، ەلىمىزدىڭ دامۋى ەنەرگەتيكا سالاسىنىڭ تۇراقتىلىعىنا تىكەلەي بايلانىستى»، - دەدى قاسىم- جومارت توقايەۆ.
پرەزيدەنت ءوز سوزىندە ەنەرگيانى ءتيىمدى جۇمساۋعا جانە ۇنەمدەۋگە باسا ءمان بەردى.
«قازاقستان - الەمدە ەڭ كوپ ەنەرگيا پايدالاناتىن ەلدەردىڭ ءبىرى. ءبىزدىڭ ەكونوميكا ەكونوميكالىق ىنتىماقتاستىق جانە دامۋ ۇيىمىنا مۇشە ەلدەرمەن سالىستىرعاندا ەنەرگيانى 3 ەسە كوپ پايدالانادى. بۇل رەتتە ءبىزدىڭ ىشكى جالپى ءونىم قۇرىلىمىندا قىزمەت كورسەتۋ سەكتورىنىڭ ۇلەسى باسىم. بۇل ونەركاسىپتىك كاسىپورىنداردىڭ نەگىزگى قورى مەن قۇرال- جابدىقتارى ەكونوميكالىق ىنتىماقتاستىق جانە دامۋ ۇيىمىنىڭ جانە الەمدەگى باسقا دا وزىق ەلدەردىڭ زاماناۋي ستاندارتتارىنا ساي كەلمەيدى دەگەندى بىلدىرەدى. ونەركاسىبىمىزدىڭ نەگىزگى قورلارىن شىنايى جاڭعىرتۋدىڭ ورنىنا، كوبىنەسە كوزبوياۋشىلىق جاسالادى»، - دەدى مەملەكەت باسشىسى.
