قازاقستاندا مەملەكەتتىك بورىشتى باسقارۋ ءتارتىبىن رەتتەۋ تاسىلدەر ازىرلەنەدى
بۇل جايىندا ءماجىلىس دەپۋتاتتارىنىڭ ساۋالىنا ق ر پرەمەر- ءمينيسترىنىڭ ءبىرىنشى ورىنباسارى ءاليحان سمايىلوۆتىڭ جاۋابىندا ايتىلعان، دەپ حابارلايدى قازاقپارات ءتىلشىسى.
«بۇگىندە قازاقستاندا بورىشتىق ورنىقتىلىقتى باعالاۋ كەزىندە ەۋرازيالىق ەكونوميكالىق وداق تۋرالى شارتتا، ۇلتتىق قور قاراجاتىن قالىپتاستىرۋ جانە پايدالانۋ تۇجىرىمداماسىندا جانە جاڭا بيۋدجەت ساياساتى تۇجىرىمداماسىندا بەلگىلەنگەن بورىشتىق كوۆەنانتتار قولدانىلادى. ءتيىستى كوۆەنانتتاردا نەگىزگى باعىتتار مەن ينديكاتيۆتىك پارامەترلەر رەگلامەنتتەلگەن، ولاردى ۇستاۋ مەملەكەتتىك بورىش دەڭگەيىن قاۋىپسىز ماندەردە ۇستاپ تۇرۋعا باعىتتالعان»، - دەلىنگەن ءبىرىنشى ۆيتسە- مينيستر جاۋابىندا.
ونىڭ اتاپ وتۋىنشە، بۇدان باسقا مەملەكەتتىڭ بورىشتىق مىندەتتەمەلەرىن رەتتەۋ قۇرالدارىنىڭ ءبىرى - ليميتتەۋ. جىل سايىن رەسپۋبليكالىق بيۋدجەت تۋرالى زاڭدا قارىز الۋ، مەملەكەتتىك كەپىلدىكتەر مەن كەپىلگەرلىكتەردى بەرۋ ليميتتەرى بەلگىلەنەدى.
«بۇل رەتتە، قازاقستان رەسپۋبليكاسىنىڭ پرەزيدەنتىنىڭ جانىنداعى رەفورمالار جونىندەگى جوعارى كەڭەستىڭ ماكروەكونوميكالىق ساياسات جونىندەگى كوميتەتىنىڭ وتىرىستارىندا مەملەكەتتىك بورىشتى باسقارۋ ماسەلەسى دە قارالۋدا. سونداي- اق، ۇكىمەت ەلدىڭ مەملەكەتتىك بورىشتى باسقارۋدى جەتىلدىرۋ ماقساتىندا نورماتيۆتىك قۇقىقتىق اكتىلەرگە تۇزەتۋلەردى پىسىقتاۋدا. وسىعان بايلانىستى، مەملەكەتتىك بورىشتى باسقارۋ ءتارتىبىن ارتتىرۋعا باعىتتالعان ءتيىستى تاسىلدەر ازىرلەنەتىن بولادى جانە جاڭا بيۋدجەت ساياساتىنىڭ 2030 -جىلعا دەيىنگى تۇجىرىمداماسىن وزەكتەندىرۋ شەڭبەرىندە ءوز كورىنىسىن تابادى»، - دەپ اتاپ وتەدى ءاليحان سمايىلوۆ جاۋابىندا.
