ياساۋي كەسەنەسىندەگى ورتاعاسىرلىق اسپالى شىراعدان تاريحي تۇعىرىنا ورناتىلدى
«قوجا احمەت ياساۋي كەسەنەسىندەگى ءاربىر بولمەنىڭ وزىندىك تاريحي قىزمەتى جاڭعىرتىلىپ كەلەدى. حالىقارالىق مۋزەيلەر كۇنىنە وراي قورىق- مۋزەي قورىنداعى XVI عاسىرعا ءتان قۇندى دا ءتۇپنۇسقا جادىگەرلەردىڭ ءبىرى اسپالى شىراعداندى تاريحي تۇعىرىنا ورناتىپ وتىرمىز. شىراعدان كەزىندە قازاندىق بولمەسىنىڭ سولتۇستىك ويىعى استىندا، قابىرحاناعا كىرە بەرىستەگى اركانىڭ ۇشىندا ىلۋلى تۇرعان»، - دەدى «ازىرەت سۇلتان» مەملەكەتتىك تاريحي- مادەني قورىق- مۋزەيىنىڭ ديرەكتورى نۇربولات احمەتجانوۆ.
XVI عاسىردا ىلىنگەن اسپالى شىراعدان 1993-1999 ج ج. ارالىعىندا كەسەنەدە جۇرگىزىلگەن جوندەۋ جۇمىسى كەزىندە تومەن ءتۇسىرىلىپ، ونى جان- جاقتى زەرتتەپ، تالداۋعا مۇمكىندىك تۋعان. وعان دەيىن ونى ەشقانداي زەرتتەۋشىلەر، نە كەسەنەنىڭ دىني قىزمەتشىلەرى ورنىنان قوزعاعان ەمەس، ۋاقىتقا بايلانىستى ونىڭ سىرتقى ءتۇسى قاراقوشقىلدانىپ كەتكەن. شىراعداننىڭ ءتۇر- تۇرپاتى قۇمىرا ءتارىزدى بولىپ كەلگەن. بۇيىرىندەگى ءۇش جەرىنەن (اسىپ) ىلىپ قويۋعا ارنالعان شىنجىر بەكىتىلگەن، ىلمەگى بار. ىلمەك - قازاندىق بولمەسىنىڭ قاقپا ەسىگىنىڭ بالعاشالارىنداعى جانۋار بەينەسىن (بارىس) قايتالايدى. وسى ءۇش شىنجىر جوعارى كوتەرىلىپ بىر دوڭگەلەك مەتالل پلاستيناعا بەكىتىلگەن دە ارى قاراي ويىق ۇشىنا ىلىنەتىن ىلمەكپەن اياقتالادى. سونداي- اق، ءبۇيىرىنىڭ بىر شەتىندە ورنەكتەپ پارسى تىلىندە جازىلعان تاريحي ماڭىزدى جازۋلارى بار: اۋدارماسى: اۋليەلەردىڭ سۇلتانى، تاقۋالاردىڭ دالەلى، قوجا احمەت ياساۋي. بۇل اسپالى شىراقتى حاججاج يبن ۋاققاس سايرامي ارنايى سۇلتاننىڭ [قوجا احمەت ياساۋي] كەسەنەسىنە ۋاقف رەتىندە سىيعا تارتتى.
