قاسيەتتى رامازان ايىندا قاراعاندى وبلىسىنىڭ ەكى وتباسىنا پاتەر سىيعا تارتىلدى
سونداي- اق، ءدىن قىزمەتكەرلەرى جاتاقحانالاردا تۇراتىن ستۋدەنتتەرگە جانە ءوڭىردىڭ كەيبىر كاسىپورىندارىنىڭ قىزمەتكەرلەرىنە اۋىزاشارعا ارنالعان جيىنتىق سالىنعان سەبەتتەر تاراتىلدى. ال «زەكەت» قايىرىمدىلىق قورى مۇقتاج جاندارعا ەكى پاتەر سىيلادى.
«قاسيەتتى رامازان ايىندا وتكىزىلگەن قايىرىمدىلىق اكتسيالارى اياسىندا وبلىستا 26373 وتباسىنا كومەك كورسەتىلىپ، 5,5 توننا ازىق- تۇلىك تاراتىلدى. يگى ىسكە قاتىسقان قالا تۇرعىندارىنا ەرەكشە العىسىمىزدى بىلدىرەمىز»، - دەيدى قاراعاندى وبلىسىنىڭ باس يمامى ءومىرزاق بەكقوجا.
«زەكەت» قايىرىمدىلىق قورى وبلىستىڭ 13430 تۇرعىنىن اۋىزاشارلارمەن قۋانتتى. سونىمەن قاتار، «رامازان كەرۋەنى» قايىرىمدىلىق مارافونى كەزىندە 12673 وتباسى ازىق- تۇلىك الدى. ولارعا 3,7 توننا ۇن، 1,2 توننا شاي، 770 ليتر كۇنباعىس مايى تاراتىلدى. سونداي- اق، از قامتىلعان وتباسىلار اراسىندا ەت تاراتىلدى. كيىممەن 270 وتباسى قامتاماسىز ەتىلدى.
«اۋىزاشارلار مەن ازىق - تۇلىك جەتكىزۋدەن باسقا، رامازان ايىندا «ەل ۇلەسى - پاتەرگە» رەسپۋبليكالىق جوباسى اياسىندا ءبىز مۇقتاج جاندارعا ەكى پاتەر سىيعا تارتتىق: بىرەۋى تەمىرتاۋدا - كوپ بالالى وتباسىنا، ەكىنشىسى جەزقازعاندا - ەرەكشە بالا تاربيەلەپ وتىرعان وتباسىنا. «ەل ۇلەسى - پاتەرگە!» 2018 -جىلى قۇرىلعان. وسى ۋاقىت ىشىندە رەسپۋبليكادا 300-دەن استام وتباسى تۇرعىن ۇيمەن قامتاماسىز ەتىلدى. مۇنداي يگى ىستەردى ودان ءارى جالعاستىرامىز»، - دەيدى «زەكەت» قايىرىمدىلىق قورىنىڭ قاراعاندى وبلىسىنداعى جاۋاپتى وكىلى مۇحيت جارىمبەتوۆ.
