ق ر پرەزيدەنتى: اسكەر سىرتتان كەلگەن قاۋىپ- قاتەرگە تويتارىس بەرۋگە ءاردايىم دايىن بولۋعا ءتيىس
بۇل تۋرالى مەملەكەت باسشىسى قاسىم- جومارت توقايەۆ مەملەكەتتىك نارادالاردى تاپسىرۋ راسىمىندە سويلەگەن سوزىندە ايتتى، دەپ حابارلايدى قازاقپارات.
«قازاقتا «ەل - ەرلەرىمەن ەڭسەلى» دەگەن قاناتتى ءسوز بار. ءبىز - تۇتاس تاريحى، قاھارماندىق ءداستۇرى قالىپتاسقان جۇرتپىز. باتىر بابالارىمىز وسىناۋ كەڭ بايتاق جەر ءۇشىن شايقاسىپ، ۇرپاعىنا ميراس ەتىپ قالدىردى. ال، كەشەگى اتالارىمىز بەن اكەلەرىمىز سۇراپىل سوعىستا جەڭىسكە جەتتى. ءبىز وتكەننەن تاعىلىم الامىز. وتان ءۇشىن، ەل مەن جەر ءۇشىن جانىن پيدا ەتكەن بوزداقتاردىڭ رۋحىنا تاعزىم ەتەمىز. تۋعان جەردىڭ شەبىن كۇزەتىپ، تۇتاستىقتى ساقتاۋ - ءاربىر ازاماتتىڭ قاستەرلى پارىزى. ەلىمىزدىڭ تىنىشتىعىن قورعاپ، قاۋىپسىزدىگىن قامتاماسىز ەتۋ - قاسيەتتى بورىش، جوعارى جاۋاپكەرشىلىك. حالقىمىز بەرەكە- بىرلىكتىڭ، تاتۋلىق پەن تۇراقتىلىقتىڭ ارقاسىندا الاڭسىز عۇمىر كەشۋدە. شىن مانىندە، وسى بەيبىت ءومىردىڭ وزىندە باتىرلىق پەن ەرلىككە ورىن بار. ەرلىك ۋاقىت تالعامايدى، سەبەبى بۇل قاسيەت وتانشىلدىقتان باستاۋ الادى»، - دەدى پرەزيدەنت.
سونداي- اق مەملەكەت باسشىسى قازىرگى تاڭدا بۇكىل ادامزاتقا كوروناۆيرۋس دەرتى قاتەر ءتوندىرىپ تۇرعاندىعىن، ىندەتتى توقتاتۋعا اسكەري قىزمەتشىلەر مەن كۇشتىك قۇرىلىمدار ءبىر كىسىدەي جۇمىلعاندىعىن، سونىڭ ارقاسىندا احۋال ايتارلىقتاي تۇراقتانعانىن اتاپ ءوتتى.
«جالپى، اسكەري قىزمەتشىلەرگە جان- جاقتى قولداۋ كورسەتۋ مەملەكەتتىڭ ايرىقشا نازارىندا بولادى. ەلىمىزدە ءوز ءومىرىن وتان قورعاۋعا ارناعان كاسىبي ماماندار از ەمەس. بۇگىنگى ماراپات پەن العىس - بارشا اسكەري قىزمەتشىلەرگە، كۇشتىك قۇرىلىم قىزمەتكەرلەرىنە كورسەتىلگەن شىنايى قۇرمەت. سىزدەردىڭ وتانشىلدىق رۋحتارىڭىز، ەڭ الدىمەن، جاس ۇرپاق ءۇشىن جاقسى ۇلگى- ونەگە. ولار سىزدەرگە قاراپ بوي تۇزەيدى. سىزدەر ەرەن ەڭبەك پەن ناعىز ەرلىكتى پاش ەتىپ كەلەسىزدەر. جوعارى مەملەكەتتىك ماراپاتتار وتان الدىنداعى قىزمەتتەرىڭىزگە جاڭا جىگەر بەرەدى دەپ سەنەمىن. باۋىرجان مومىش ۇلى «ەلىڭدى سۇيمەي، ەرلىك جاساي المايسىڭ» دەگەن. قازىر ورتامىزدا سىن ساعاتتا جانقيارلىق كورسەتكەن بەيبىت كۇننىڭ باتىرلارى تۇر. ولاردىڭ قاي- قايسىسى دا قۇرمەت پەن قوشەمەتكە لايىق. مەرەكەگە وراي، مەنىڭ جارلىعىممەن ءبىر توپ ازامات جوعارى مەملەكەتتىك ناگراداعا جانە اسكەري، ارناۋلى اتاققا يە بولدى. وسى ساپتا قارۋلى كۇشتەردىڭ جانە قۇقىق قورعاۋ سالاسىنىڭ، ارنايى ورگانداردىڭ وكىلدەرى بار. تۇپتەپ كەلگەندە، ءبارىڭىزدىڭ قىزمەتتەرىڭىز ورتاق، مىندەتتەرىڭىز ءبىر. بۇل - ەل قاۋىپسىزدىگىن قامتاماسىز ەتۋ»، - دەدى قاسىم- جومارت توقايەۆ.
