كوروناۆيرۋستان قايتىس بولعان ادامدى جەرلەۋ راسىمىندە قانداي وزگەرىس بار؟
بۇل تۋرالى ق ر دەنساۋلىق ساقتاۋ ۆيتسە-ءمينيسترى اجار عينيات ايتتى، دەپ حابارلايدى قازاقپارات ءتىلشىسى.
«قازىرگى ۋاقىتتا جەرلەۋ ءراسىمى رەسپۋبليكانىڭ باس مەملەكەتتىك سانيتار دارىگەرىنىڭ قاۋلىسىنا سايكەس رەتتەلىپ، جۇرگىزىلەدى. كوروناۆيرۋس ينفەكسياسىنان قايتىس بولعان ادامنىڭ ءمايىتى ارنايى ورىندا، ياعني پاتالوگواناتوميالىق مورگتاردا، بولىمشەلەردە جۋىندىرۋ كەرەك. وسى جۋىندىرۋ راسىمىنە تۋعان-تۋىستارىنان ەكى ادام قاتىسا الادى. تۋىستارى كىرگىزبەس بۇرىن قورعانىش كيىمدەرمەن، قۇرالدارمەن قامتاماسىز ەتىلەدى. ءمايىت جۋىندىرىلعاننان كەيىن جەرلەۋ ءۇشىن تۋعان-تۋىستارىنا بەرىلەدى»، - دەدى ۆيتسە-مينيستر.
ونىڭ ايتۋىنشا، جانازا راسىمىنە مارقۇمنىڭ تەك تۋعان-تۋىستارى قاتىسىپ، ارا قاشىقتى ساقتاۋى، ماسكا تاعۋى قاجەت.
«بۇگىنگى تاڭدا جۋىندىرىلىپ بەرىلگەن ءمايىتتى ءدىني قىزمەتشىلەرگە نەمەسە تۋعان-تۋىستارىنا ۇستاۋعا بولمايدى. بارلىق مايىتتەر جالپى زيراتتارعا جەرلەنىپ جاتىر. بۇگىنگى جەرلەۋ ءادىسى وسىنداي»، - دەدى اجار عينيات.
