ۇ ب ت تاپسىرۋ كەزىندە ءتارتىپ بۇزعاندارعا ەكىنشى مۇمكىندىك بەرىلمەيدى
بۇل تۋرالى الماتى قالاسى ءبىلىم باسقارماسى جالپى ورتا ءبىلىم بەرۋ ءبولىمىنىڭ باسشىسى اقمارال ايتۋاروۆا ونلاين بريفينگ بارىسىندا ايتتى، دەپ حابارلايدى قازاقپارات ءتىلشىسى.
اقمارال ايتۋاروۆانىڭ ايتۋىنشا، بيىل اقپاراتتىق قاۋىپسىزدىكتى قامتاماسىز ەتۋگە ەرەكشە كوڭىل ءبولىندى، تەستىلەۋ پروتسەسى شيفرلاۋ ەلەمەنتتەرى بار ارنايى باعدارلامالار ارقىلى جۇزەگە اسىرىلادى، سوندىقتان ينتەرنەتكە قوسىلۋدىڭ باسقا دا تاسىلدەرى قولدانىلمايدى. بۇرىنعىداي كەز- كەلگەن گادجەتتى، ۇيالى تەلەفونداردى، ساعاتتاردى، سىمدى جانە سىمسىز قۇلاققاپتاردى، شپارگالكالاردى جانە كالكۋلياتورلاردى الىپ جۇرۋگە تىيىم سالىنادى.
«ۇ ب ت تاپسىرۋدىڭ 1-ارەكەتى كەزىندە ءتارتىپ بۇزىلعان جاعدايدا ەكىنشى مۇمكىندىك بەرىلمەيدى. ۇ ب ت تاپسىرۋدىڭ 2-ارەكەتى كەزىندە ءتارتىپ بۇزۋشىلىققا جول بەرىلسە، تۇلەك گرانت الۋ كونكۋرسىنا قاتىسۋ قۇقىعىنان ايىرىلادى»، - دەيدى اقمارال ايتۋاروۆا.
سونىمەن قاتار، ول ۇ ب ت تاپسىرۋعا كەتەتىن شىعىنىڭ قىسقارعانىن تىلگە تيەك ەتتى.
«بيىل ۇ ب ت تاپسىرۋعا كەتەتىن شىعىن ايتارلىقتاي قىسقارادى. سۇراق كىتاپشالارىن، جاۋاپ پاراقتارىن جانە باسقا قۇجاتتاردى باسىپ شىعارۋدىڭ قاجەتى جوق. بۇعان دەيىن قر ءبىلىم جانە عىلىم مينيسترلىگىندە حابارلاعانداي، بيىل ۇ ب ت- دا 600 ميلليون تەڭگە ۇنەمدەلەدى. كەلەسى جىلدارى بۇل سوما ازايادى، ويتكەنى بيىل ۇ ب ت- نى ەلەكتروندى فورماتقا اۋىستىرۋ شىعىندارى بولدى»، - دەيدى ول.
ايتا كەتەيىك، بيىلعى وقۋ جىلىندا قالانىڭ ورتا ءبىلىم بەرۋ ۇيىمدارىندا 11337 تۇلەك مەكتەپتى بىتىرەدى.
