سوڭعى ۋاقىتتا تۇزەتۋ مەكەمەسىنە قايتادان كەلەتىن ادامداردىڭ سانى كۇرت ازايدى - ا. جۇماعاليەۆ
مۇنداي پىكىردى ق ر ۇلتتىق ۇلانى «باتىس» وڭىرلىك قولباسشىلىعىنىڭ قولباسشىسى ارمان جۇماعاليەۆ ءبىلدىردى، دەپ حابارلايدى قازاقپارات ءتىلشىسى.
«بۇگىندە ۇلتتىق گۆارديا ءبارى ءۇشىن دە اشىق. ءتىپتى اسكەري قىزمەتتە بولماعان تانىستارىمنىڭ كوپشىلىگى ول جايىندا كوپ جايتتان قۇلاعدار. ياعني، ولاردىڭ نەمەن اينالىساتىنىن، قوعامدىق ءتارتىپتى قاداعالاۋدا قانداي ءىس اتقارعانىن، ونىڭ ىشىندە تۇزەتۋ مەكەمەلەرىن كۇزەتەتىندىگىن جاقسى بىلەدى. ولار تۇزەتۋ مەكەمەلەرىندە قايتا تاربيەلەۋدى قاجەت ەتەتىن ادامداردىڭ ۇستالاتىندىعىن تۇسىنەدى»، - دەدى ول قازاقپارات تىلشىسىمەن تەلەفون ارقىلى تىلدەسۋ بارىسىندا. سونىمەن قاتار ول تۇزەتۋ مەكەمەلەرىنىڭ جۇمىس تيىمدىلىگىنە قاتىستى دا ويىمەن ءبولىسىپ ءوتتى. «قوعامىمىزدا ءتۇرلى ادامدار بار. ولاردىڭ پسيحولوگياسى، دۇنيەتانىمى، كوزقاراسى ءارتۇرلى بولىپ كەلەدى. تۇزەتۋ مەكەمەلەرى سوتتالعانداردى 100 پايىز دۇرىس جولعا تۇسىرەدى دەپ ايتا المايمىن. شامامەن 82 پايىزى قالىپتى ومىرگە ورالاتىندىعى راس. سوڭعى ۋاقىتتا تۇزەتۋ مەكەمەسىنە قايتادان كەلەتىن ادامداردىڭ سانى كۇرت ازايدى. ماسەلەن، كەڭەس وداعى زاماندا تۇرمەگە قايتادان تۇسەتىن سوتتالۋشىلاردىڭ سانى كوبىرەك بولاتىن. قازىر ولار بوستاندىققا شىققاننان كەيىن جۇمىسقا ورنالاسىپ، قوعامعا ءسىڭىسىپ كەتىپ جاتىر. سوندىقتان سوتتالعانداردىڭ باسىم بولىگى كوللونياعا قايتىپ تۇسپەيدى»، - دەدى ارمان جۇماعاليەۆ.
«باتىس» وڭىرلىك قولباسشىلىعىنىڭ قولباسشىسى ءسوز سوڭىندا اسكەري قىزمەتتى تاڭداۋىنا اكەسى سەبەپكەر بولعانىن ايتتى.
«اكەم اسكەري قىزمەتشى بولعاننان كەيىن وسى ماماندىقتى تاڭدادىم. ەكى اتام سوعىستا مەرت بولدى. وسى سەبەپتەر ماماندىق تاڭداۋىما تۇرتكى بولىپ، اسكەري قىزمەتتى تاڭداعان ەدىم»، - دەدى ول.
اۆتور: مارلان جيەمباي
